جمهوريتنا

دولة الظرفاء العظمى

يجب علينا نحن معشر "الخناشير".. في هذا المنعطف التاريخي الذي نعيشه تحت ارهاب النسوان في البيوت وخارجها.. أم تتوحد صفوفنا.. وان نعرف عدونا جيدا.. فالمعسكر "الحريمي".. شتت الله شملهن.. وفرق جمعهن.. توحد علينا.. وأصبحت لهن الآن أجهزة مخابرات وأقمار صناعية.. تراقبنا في كل خطوة.. وأخطر ما في هذا المعسكر.. أقلامهن.. يا حضرات.. ولا أقصد طبعا.. أقلام الروج فنحن دائما نأكلها.. لكنها الأقلام التي تهاجمنا.. وتحولت الي سيوف تبارزنا بالمقال.. بعد ان كانت ولغاية امبارح بعد نص الليل تبارزنا بالعيال.
و"كتاب جوازي يا عين.. ما شفت زيه كتاب" وخصوصا اذا كتبته امرأة من طراز ونوعية "هاله بنت بلاله".. فضحانا.. ومراقبانا.. وهي دائما ترتدي روب المحاماة الأسود من قرن الخروب تدافع عن صنف النساء.. ضد كافة أنواع الرجال السوبر والعادة انها يا معشر الخناشير الأفاضل.. عدوتكم الأولي.. فهي تقريبا المتحدث الرسمي عن بنات حواء.. تقرأ مقالاتها يا جدع تدق في نافوخك وقلبك موسيقي الحرب والله زمان يا سلاحي.
وتجري الي الزجاج تدهنه بالأزرق.. وتنزل الي الخندق ما استطعت الي ذلك سبيلا.
مقالات هاله.. بس الكلام ده ما يخرجش بره.. وراها ست مقتدرة.. يعني متسلطة قوي.. امال ايه ما هي عاشت في أمريكا.. وتفهم في لغة الكاوبوي.
يا أخي دي بتمسك مقصوف الرقبة "الدكر" وتمسح بكرامة أهله الأرض.. وهو لا يصد ولا يرد.. فرحان بسلامته انه تحول الي حلقات رمضانية تلعب بطولتها "الهانم" يعني كاسفانا.. حتي بنظام بال وسيكام وديجيتال!!
تحدثت هاله كثيرا وباستفاضة عن جبروتنا نحن الرجال.. قال ايه احنا متغربين!.. طب ازاي وأتخن شنب فينا.. يقوم في منزله بعجين الفلاحة ونوم العازب ان لم يكن بتعليمات مباشرة من المدام.. فعن طريق بناتها.. وبرضه يا خويا مش عاجب.. ومش نازل لهن من زور حتي لو ولع صوابعه كلها شمع.
واذا رفضت التعليمات والأوامر.. فتحت لك الملف والملاية واذا كنت نسيت اللي جري.. نجيب لك الدفاتر تنقري.
فاكر لما مشيت مع فلانه سنة كذا.. يوم كذا.. ساعة كذا قبل الميلاد!! وقبل الجواز!!
فاكر لما ضبطوك في بير السلم بتحط للبنت زوبة العامشة قطرة في رقبتها..!! وعشان تداري كسوفك قلت لهم أنا باصلح الكهربا!!
فاكر لما كنت ماشي معايا في الاسكندرية وبصيت بعينيك اليمين وبزاوية 45 درجة للبنت الخواجاية اللي كانت ماشيه وطالعه من هدومها في ميدان الساعة!!
وبعد كده تغني لك "لسه فاكر".. وانت يا حول الله مش فاكر اسمك؟ انه التحريض المستمر من أجهزة الاعلام الحريمي وعلي رأسهن هاله كاتبة أخطر مانفيستو ضدنا يا أولاد دادي آدم.
والواجب يقتضي ويحتم علي أن أحذركم من هاله وكل هاله.. علي نفس الطريقة.. واياكم ودخول مزلقانها ومقالاتها الي منازلكم.. انها أنابيب بوتاجاز مفتوحة وبجوارها مشط كبريت مولع..
ولذا كان مهرجان القراءة للجميع شهر في السنة.. فمهرجان "هاله" وغيرها.. و"خلي بالك قوي من غيرها".. يستمر طوال السنة و24 ساعة في اليوم.. ألا يعجبهن اننا أصبحنا الحيطة المايلة لكل حواء.. مع اننا غلابة وعايزين نعيش.. وضل ست ولا ضل شجرة!!.. والواحد مننا ملوش غير بيته ومراته وكفايه ينام مستور.
ولكن اياكم و"هاله".. وأعلنها صريحة مدوية.. لا تطبيع ولا اتفاقيات ثنائية منفردة.. ولا هرولة.. وليكن شعارنا من دلوقت وجاي:
السكوت مقابل السلام..!!
لأن الأرض أرضنا.. عن أبونا وجدنا.. وبكره ولا بعده لحريمنا بعدنا!!
نعم يا دكتوره هاله.. كتاباتك زي العسل.. لكنه العسل الأسود بعيد عنكم.. وسنتزوج حتي آخر قطرة من دمنا ولبيك يا عم الرجولة.. كلنا نحمي حماك!!
الأمور
عايز يبقي مشهور!
غادة مصطفي
"الأبناء" بابا.. "الأب" خير في ايه؟ "الأبناء" عايزين نبقي مشهورين "الأب" أنا أعرف عايزين نأكل أو نشرب نبقي مشهورين جديدة والمطلوب مني ايه دلوقت "الأبناء" أبداااا يا بابا مش مطلوب من حضرتك حاجة احنا خلاص قررنا نبقي مشهورين. "الأب" ازاي مش فاهم؟ "الابن الأكبر" أنا مثلا خلاص هشتغل مذيع واستضيف كام واحد من بتوع تحضير الأرواح وأجيب شيخ مش مشهور وشوية بخور علي شوية تأليف الحقة تشتهر واسمي يكبر ويبقي قد الفيل "الابن الأصغر" أما أنا بقي عرفت طريق الشهرة خلاص هضحك أنا وأصحابي علي الناس الطيبين المحترمين وأسجل فيديوهات ساخرة والناس تعمل شير والجرايد تكتب ولو حد اعترض أبقي أعتذر أو أعمل من نفسي بطل حتي لو بطل ورق "الابنة الصغري" أما أنا هكون كاتبة ومفكرة أتكلم في اللي أفهمه وأعرفه واللي معرفوش هو يعني حد عارف حاجة أصلا مفكرة ومثقفة بقي وعندي أفكاري "الأب" وآسفاه وعايزين نبقي مشهورين مشهورين ايه بس فين الأخلاق بلاش فين الضمير "الأبناء" موجود يا والدي بس في اجازة الشهرة حلوة مافيش كلام "الأب" أنتم فاهمين الشهرة غلط.. كان فيه طفل زمان قرر انه يفيد الناس اتعلم وبقي دكتور جراح كبير وكمان مشهور مش في مصر بس انما في العالم واستفاد الناس من عمله شرف بلده عارفين هو مين؟ "الأبناء" هو مين؟ "الأب" الجراح المصري دكتور مجدي يعقوب "الأبناء" يعني هنتعلم طول حياتنا؟! "الأب" مش شرط علي فكرة تبقوا دكاترة المهم تفيدوا بلدكم في المكان اللي أنتم فيه بعملكم النافع الناس هتعرفكم فيه جنود بتموت كل يوم علشان أنتم تعيشوا وتعمروا بلدكم عمروها وبلاش تخربوها يا ملاحيس. مش كفاية اللي بنشوفه من عيال "ستار أكاديمي" والخلطبيطة اللي هما فيها.
فراخ اسنا
متهمة بجريمة قتل
يا بوووي!
حمادة بدران
اسنا
كان الله في عون الصعايدة.. يلاقوها من "خايب الرجا" اللي اسمه "بربور السبكي" ولا من المصايب الثانية.. وآخرها اللي جري في اسنا لغاية ما ضربنا الهوا ونعسنا لكن من غير ما يغمض لنا جفن يا بوي
أولها يا سيدي وجود كمية فراخ فاسدة في مستشفي اسنا.. وجايز كانت متهمة في جريمة قتل ومنتظرة الطب الشرعي.. وسيبك من "الفروج" وتعال لصحراء اسنا.. حيث تم ضبط مخزن لتجميع المخلفات والنفايات الطبية.. وبدأت الناس تضرب اخماسها في اسباعها بين ابن الحرام الي عمل اللي عمله..
وتطلع علي قناطر اسنا الجديدة.. تلاقي المرور منع العربيات تمشي فوقها وسمح لها تمشي فوق القناطر القديمة بسبب أعمال الصيانة.. مع ان القديمة قبل كده كانت "كخه"
ونروح علي مكتب صحة اسنا.. نلاقي البلديات شايل الهم لأنهم طلبوا منه 150 لحلوح عشان يسجلوا ابن المولود.. يحلف طلاق ثلاثة ان ولده مزلوط هنا في المستشفي بتاعتهم وهي حتة ورقة تثبت الكلام ده.. يقولوا مش معقول ندفع 300 لحلوح ضرايب عشان حضرتك تاخد الورقة.. يعني النص بالنص وخليها تمشي يا أبو خالد
الست حرمه.. فكرت تعمل نفسها ولدت في البيت ويضرب جوزها الورقة ويختمها بالنبوت لكن يا تري مكتب الصحة هيكون رأيه ايه..؟