معكم

أحمد الصبيحي

** غالباً اللي بيحبوا الصيف وبيكرهوا الشتا.. زملكاوية.. هما كده. خالف تعرف.
** أمريكا عملت دستورها في 7 سنين.. سبع سنين يا متعلمين يا بتوع المدارس.
** اللهم أجمع القرآن في قلبي حفظاً. وعلي لساني تلاوة. وفي سلوكي خلقاً. وارزقني منه العلم والعمل. يارب العالمين.
** يارب كل اللي عاملين رنة موبايل مستفزة يتحبسوا في أوضه ويفضلوا يسمعوها دون توقف 6 ساعات ورا بعض.
** مزاج الشاي لن يستوعبه مدمنو النسكافيه اللعينين.
** الشعب الألماني طويل فحت.. أنا أقصر واحد في البلد دي..
** سلام علي كل سيدة رزقت بأطفال من ذوي الاحتياجات الخاصة. وكان نضالها عبارة عن فعل يومي. في مجتمع لا يري سوي نفسه في المرآة.
** ما تنكروش إن إحنا شعب مبدع. وأول من اخترع الشتيمة بالكلاكس.. تت تت.. تاتااااا.
** مرة ركبت مع سواق تاكسي بقوله خش يمين. رد عليا قالي: لا. استني. أنا هوصلك من طريق علي ذوقي.. ذوقك مين.. أنا واخدك تنقيلي بدلة الفرح؟
** أنصح كل شاب مقبل علي الزواج. إنه يشوف البنت اللي هو اختارها وهي بتنضف ولابسه الجلابية إياها والمنديل إياه. وبتغتصب كرامة سجادة غلبانة.
** أسامة غريب: الجبنة البيضا طعمها غريب في أمريكا.. الأغبياء لا يضعونها في الفورمالين.
** صانع طائرات الميراج يحذر من فناء فرنسا بسبب السماح بزواج الشواذ.
** صباحكم حلو وبيضحك.. أيوه بيضحك عادي يعني.. ماهوش كله غم ولا إيه؟
** اللهم إني أسألك الخير والستر والرضا بما قد قسمت.
** عاجل وحصري.. أنا جعان.
** إذا رأيت في التلاجة 5 أشياء مرتبة. فتأكد أن الست ماما مخبية "شيء لذيذ" لبعد الغدا.. "للعيلة كلها يا طفس".
** ليه الناس بتحارب بعض ع الأرض. مع إن أكتر مكان بيحبوه هو البحر؟
** وأذاكر المنهج كله ليه.. ماكدا كدا الوقت مش هيكفي أحل الامتحان كله؟!