عكاشة لخيري رمضان: يالي مقاس جزمتك 44 وبتسهر في الزمالك، بتتكلم عليا يا كوكو (فيديو)

"استناني يا خيري يا رمضان.. حاتكلم عنك دلوقتي.. يالي مقاس حذاءك 44، وبتسهر في الزمالك".. بهذه الكلمات بدأ الإعلامي توفيق عكاشة حملة الهجوم على الإعلامي خيري رمضان خلال برنامجه "مصر اليوم" على قناة "الفراعين" التي يرأسها.
عكاشة أكد ان خيري رمضان يصر على مهاجمته في برنامجه، وقال: " أولاً هو لا مذيع ولا ليه علاقة بالإعلام، هو أبيض وبيقبض من القناة اللي بيشتغل فيها وخلاص، ماشي يا خيري ياللي بتسهر في الزمالك أقولك بتقعد فين ولا بلاش، ماشي يا خيري ابقى اتكلم كويس".
وتابع: "هو مش انت كنت بتشتغل في برنامج "مصر النهارده" اللي تبع فريق أنس الفقي، اللي كنت بتضربله تعظيم سلام من الدور الأول للدور التاسع، أنت جيت بالبارشوت عن طريق أنس الفقي وصفوت الشريف، أنت مش مكسوف من نفسك، بتتكلم عليا وبتقول انك أرسلت لمدير القناة رسالة بتطالبني فيها بتقديم الأوراق اللي عندي انا قدمتها يا اخويا وصاحب قناة محمد الامين حيطلب قريب للنائب العام".
وأضاف: "أنت اسمك خيري رمضان ولا خيري شعبان ولا ذو الحجة، وانا عايز اسألك سؤال يا خيري شعبان، انت راجل بتتنبأ بالأحداث في أحلامك، وانت تنبأت في حريق المجمع العلمي قبلها بأربع ساعات، مين اللي قالك يا كوكو، يا شعبان مين اللي قلك، وأريد أن اعرف لماذا أغلق النائب العام هذا الملف".
وأنهى عكاشة كلامه قائلا: "سيب التلفزيون لصحابه يا خيري، والله يرحم لما كنت بتقف على باب التلفزيون علشان حد يشوفلك واسطة وتشتغل فيه، الله يرحم ايام صفوت وأنس، انت حتنسى ولا أيه، ربنا يديك الصحة، انا بحب اسمك عشان فيه شهور جميلة".