الغندور: "كورة ايه ونيلة ايه.. المهم القصاص مش هبوط المصري"

شن الاعلامي خالد الغندور هجوما على من ينشغلون بالحديث عن العقوبات المتوقع توقيعها على النادي المصري بعد مجزرة استاد بورسعيد فى الوقت الذى لم يتحقق فيه القصاص للشهداء حتى الآن.
وقال الغندور فى برنامجه عبر قناة "دريم" مساء السبت: "كل ام وكل اب قلبهم محروق ومحدش هيحس بيهم أو زيهم. بتوع بورسعيد مش فارق معاهم المهم المصري هينزل ولا مش هينزل ومركزين فى كده وبس بينما اهل الشهداء عايزين القصاص واللي قتلوا ولادهم".
وتابع: " لازم نعرف ان القضية برضه مش سهلة خاصة ان الاطراف غير محددة ولازم ده يوصل لأسر الشهداء".
واضاف: "أوجه كلامي لاهل بورسعيد المحترمين وأقول لهم مش القضية المصري هيبط ولا ايه المهم القصاص ولو الناس دي ارتاحت مش هيفرق معاهم بعد كده المصري يهبط أو لأ".
وانتقد الغندور بعض البرامج الرياضية التى تستنكر عدم اتخاذ اتحاد الكرة لموقف ضد المصري حتى الآن متابعا: "الاتحاد بعدها بيوم تمت اقالته قبل أن يقدم استقالته والمسئولين الآن لا يقدروا على اتخاذ أى قرار فى هذا الشأن لأنه قرار سياسي متعلق بمصير المحافظة وأمن البلد ككل".
وأضاف: "الاعلاميين اللي عاملين ثورجية وبيهاجموا اتحاد الكرة..كورة ايه ونيلة ايه اللي بنفكر فيها دلوقتي.. مش عايزين نولع البلد تاني".
واختتم نجم الزمالك السابق حديثه قائلا: "لو كانت الكارثة دي حصلت فى مباراة أهلي وزمالك مكنش حد هيقول عن فريق منهم انه يهبط خصوصا انه ده قرار وقتها سيتعلق بأمن الدولة".