أحمد عبد الفتاح: أسألوا تامر حسني عن سرقة قصة نور عيني

هبة أيوب - عيون ع الفن:
طالب المؤلف أحمد عبد الفتاح كاتب سيناريو فيلم "نور عيني"، من النقاد ان يترفقوا بصديقه الفنان تامر حسني، لانه بحاجة الى دفعة معنوية، لذلك يتوجب عليهم ان يتحدثوا عن الأشياء الجميلة في الفيلم.
وأضاف أحمد: " رأي النقاد طبعا علي عيني وراسي، بس هم دايما بيكون عندهم آراء مسبقة، خاصة إن ده فيلم لتامر فأكيد عندهم كلام معين عايزين يقولوه عليه زي مابيحصل مع كل فيلم ليه، بس أنا رأيي إنهم المفروض يتحدثوا أيضا عن الحاجات الحلوة إللي في الفيلم، فالموضوع مختلف، وتامر قدم جديداً في الفيلم، لكن برضه أنا مينفعش أطلعه غير بشخصية واحد دمه خفيف ورومانسي، وبعدين الناس محتاجة النوع ده من الأفلام، الناس مش ناقصين كآبة، ثانيا تامر ممثل كويس جدا، وبيعرف يعمل أفلام كويسة، والإيرادات تشهد بكده".
وعن اتهامه ب "تفصيل" الافلام لتامر حسني، قال أحمد في حوار له مع جريدة الدستور: " انا بعترف اني بفصله الافلام وأنا مبفصلش سيناريوهات لحد غيره، رغم أنه بيتعرض عليّ كتير إني أكتب سيناريوهات لنجوم لكني برفض، وتامر هو الوحيد اللي بحب أكتبله مخصوص لأنه صاحبي".
كذلك اكد احمد انه حزين من حذف المخرج وائل إحسان لبعض المشاهد التي كتبها بالسيناريو، لانه يرى انها كانت هامة لسياق الفيلم، ولم يكن يجوز حذفها.
ورداُ علي النقد الذي اكد أن قصة الفيلم مسروقة من المسلسل الكوري "قصة حب حزينة"، قال أحمد : "أنا مليش دعوة بقصة الفيلم اسألوني عن السيناريو بس، أنا مشوفتش المسلسل ده، وكمان قصة الفيلم تامر حسني هو إللي كاتبها".
جدير بالذكر ان فيلم "نور عيني" يدور حول نور (تامر حسني)، الذي يعيش في إحدى المحافظات، ولديه موهبة الغناء، ويتجه للقاهرة للدراسة في كلية التربية الموسيقية للوصول لحلمه، وهناك يقابل منة شلبي التي تقدم دور فتاة كفيفة، وتتوالى الاحداث.
الفيلم من إنتاج محمد السبكي وإخراج وائل إحسان، وقصة تامر حسني وسيناريو وحوار أحمد عبد الفتاح.