"أوعدك يا مصر" شعر للمستشار عماد أبو هاشم

أوعدك يا مصر
حَ اشيل الحلم فى كفى
واصحى الفجر من نومه
والم الشمس للضلمه
فِ منديلى
وأشغل توبك الفضى
بلون الدم فِ عروقى
ونتقابلْ
أنا وانتى
على صفحة مواويلى
على صوره
حنرسمها
تكملها
طيور البحر فِ المينا
وتبقى الموجه عنوانى
حتقرينى على كفك
أنا حظك
أنا شْراعك
ومجدافك
ضرورى فْ يوم حَ نتحاسب
حَ يطلع عمرى مديونلك
ويحلف قلبى عَ المصحف
حروف الحب حَ ازرعها فِ أغنيه
حَ اسكِّنها فِ بنيه
ونتعلم
أنا وانتى
ندفى الحب جوانا
بِدفايه
ندوب حلمنا الورى
فِ كبايه
ونتغطى بِكلمة حب
تدفى القلب
ونلبسها
( مَ شاء الله )
تِجيب الحظْ
وتحفظنا من النظره
مصمم إنى اعيش فيكى
واسافر جوه إحساسك
أنا أهلك
أنا ناسك
فِ محرابك
أنا ناسك
وأستاذك
وتلميذك
حَ اناديلك
واجيب الكلمه وافرشها
واصلى فوقها وادعيلك
واهز الحرف ينزلى
بلح لونه
بلون الطيف
لأولادك
شتا
أو صيف
ويدبل فِ الورود خوفها
وإحساسها
بإن الناس
بتزرعها
وترويها
وفِ الآخر
بكل الأسوه والشده
بتقطفها
شعر المستشار عماد أبوهاشم رئيس محكمة المنصورة الإبتدائية ، عضو المكتب التنفيذى لحركة قضاة من أجل مصر