"فيس بوك" و"تويتر" فى تعليقات ساخرة على الحرب الكورية - الأمريكية

شهد موقعا التواصل "فيس بوك" و"تويتر" حالة من الزخم الشديد بالتعليقات الساخرة إثر تهديد كوريا بشن حرب نووية على أمريكا؛ حيث عبر نشطاء الموقعين عن تشكيكهم فى إمكانية قيام مثل هذه الحرب وأنها لا تتعدى أن تكون مناوشات بين الدولتين وتهديدات من الصعب تحقيقها.
وخرجت التعليقات الساخرة التى أسقطها النشطاء على الواقع السياسى الذى تعيشه مصر تارة، وعلى صعوبة قيام حرب بين البلدين، فكتب محمد فاروق: "محدش يعرف قناة هتذيع الحرب بين كوريا الشمالية وأمريكا مباشر؟!! أصل أنا مجهز فشار وعايز اتفرج".
وكتب عمرو: "نصيحة لأهل كوريا: صاحب الضربة الجوية الأولى فى الحرب دى بعد ما يعمل عملته اقتلوه!! عشان هيذل أهاليكم بعد كده بالضربة دى!!".
ولم تخلُ التعليقات الساخرة من الإسقاط على تصريحات السياسيين والإعلاميين فى مصر؛ فقالت هاجر حسونة: "زمان البوب زعلان أن الحرب الكورية الأمريكية هتقوم.. لأن النت هيفصل.. فمش هيعرف يتوت!!".
عمرو حسينى: "عاجل: تعليقات السياسيين والإعلاميين على إعلان كوريا الشمالية الحرب على أمريكا.. البرادعى: حرب تستغل البوذيين الأبرياء هى الدخول فى النفق المظلم.. لك الله يا أنجيلينا، حمدين: أنا أعلنها صريحة.. حرب دون انتخابات رئاسية مبكرة هى الاستبداد بعينه، محمود سعد: إيه اللى ودا الأمريكان عن النووى بتاعهم".
وعلى صفحة "مبنتهددش" كتب أدمن الصفحة: "أمريكا تهدد وتتوعد كوريا الشمالية بأنها سوف ترسل جبهة الإنقاذ الوطنى بقيادة البرادعى وحمضين بزيارتها قريبا.. وكوريا الشمالية ترد سلمية سلمية!!".
إسراء محمد: "أى حد يسأل عليا قولوله بيتفرج ع الحرب على القهوة".
حمدى العربى: "أنا عرفت أصل الموضوع كله: كيم يونج وأوباما حد عامل لهم عمل ومخبيه فى غواصة نووية تاهت فى المحيط.. عموما احنا هنروح نتفرج على الحرب فى الاستاد.. مش عاوزين كلاكسات بعد الحرب: اللى يكسب نهنيه واللى يخسر نواسيه.. واسمع سلام النووى الكورى بيضحك ليه.. أصل أوباما بيبحلق فيه".
زينب محمد: "كوريا هاتخش حرب.. هاتوا اللب والحاجة الساعة عشان نتفرج.. كوريا رجعت ف كلامها.. شيل يا ابنى اللب والحاجة الساقعة رجعهم مافيش نصيب نتفرج!!".
ماجد مسلم عبر "تويتر": "الهتاف الآن فى كوريا (افرحى يا تهانى.. الحرب راجعه تانى!)".
محمد ثابت: رئيس كوريا وهو بيشرح خطة الحرب: هيلعبوا 4-4-2 وأبو تريكة هينزل ف الشوط التانى ولو أمريكا كان مستواها أحسن الجماهير تنزل الملعب وترمى نووى".
فتحى أبو تريكة: "أغنية الحرب لتشجيع جنود كوريا: من كوريا شمااااال.. بنهز جباااال.. وبأعلى صوت يونج قاهر الأدغاااال.. يا كيم يا كبير.. يا كيم يا عظيم.. إديله نووى وبردو قليل!!".
سلمى محمود: "هتاف الشعب الكورى فى الشوارع الآن قوة.. عزيمة.. إيمان.. هنضرب نووى فى كل مكان، على أمريكا.. رايحين.. شهداء بالملايين!!".
هذا فيما حلل البعض الآخر الوضع السياسى بين الدولتين، مستبعدين إمكانية قيام الحرب بين الدولتين، فقال أنس حسن: "مفيش احتمالية حقيقية لحرب مع كوريا، لكنْ فيه تصعيد لنغمة عدو جديد للولايات المتحدة سيسهم فى تشكيل مواقف سياسية جديدة".
صلاح الحجرى: "وأخيرا هنتفرج على حرب عالمية تالتة وكمان لايف بس يا رب الجزيرة المشفرة ماتخدهاش وتذيعها حصرى!!".
عمر الباز: "حرب إيه وكلام فاضى إيه ده مستحيل الأمر لا يتعدى أن يكون تهويش بين الدولتين لا دى مستعدة ولا دى مستعدة زى نووى إيران كده بالظبط".
رضا المنشاوى: "أمريكا كل شوية يظهر عدو جديد لها مرة إيران ومرة كوريا والدنيا هتقوم عليها قريب".
محمد رياض: "كل شوية تظهر فى الأفق أزمة بطلتها أمريكا مش عارفين المستقبل هيبقى إزاى وأوباما عادى كده ولا حد بيسمع صوته!!".