مواطن ل"الإبراشي": بعت دهب مراتي عشان السيسي ودلوقت بشحت

انتقد مواطن يدعى "أحمد" الأوضاع الاقتصادية في مصر، مطالبًا بإقالة جميع أعضاء مجلس نواب العسكر وتغيير اسم المجلس إلى "مجلس الشعب" لكي يكون معبرًا عن المواطن .

وقال المواطن المذكور في مداخلة مع برنامج العاشرة مساءً الذي يقدمه وائل الإبراشي: "أنا عندي 3 أطفال كلهم في مدارس وأنا راجل مستورد وأقسم لك بعزة جلالة الله أن أنا من قبل شهر رمضان ما دخل بيتي جنيه ووقفت البضاعة بتاعتي وربنا ينجينا من البلد دي، وبقول للأستاذ عاطف أنا لسه جايب ب3 جنيه عيش فينو و4 زبادي ونصف لتر لبن وشيبسي وحلويات للعيال ب37 جنيه".

وأضاف: "أطالب بإقالة الحكومة الفاشلة اللي خلت الدولار ضرب الجنيه غرقه ، وفي كارثة تانية أن الجمارك المصرية بتحاسبك على سعر الدولار البنكي يعني لو جايبين حاوية ب100 ألف ولما الدولار في البنك يبقى ب14 جنيهًا يبقى الحاوية دي هتبقى ب140 ألفًا.. مين اللي هيدفع الزيادة في سعر الحاوية؟ الشعب".

وأردف: "أنا واحد من الناس خلاص.. كنت عايز أربي عيالي بالحلال فى الدولة دي، بس للأسف الشديد بنتي اللي في تالتة إعدادي بتقولي أنا مش عايزة أعيش في مصر ..أنا شايفة مصر بتغرق الشباب والتعليم والصحة فاشلين ومفيش حاجة في الدولة عدلة .. دة شقة الطعمية ب2 جنيه .

وتابع: "أنا راجل من مؤيدي عبد الفتاح السيسي وأيام ثورة 30 يونيو بعت الدهب بتاع مراتي وعملت له 3000 تيشيرت مكتبتش عليهم اسمي حتى عشان عايز مصر تقوم.. ودلوقت أنا بقوله يا يا سيسي أنا مخدتش منك حاجة.. أنت كدة بتخليني أسيب عيالي وأهج من مصر .. بحملك أنت وحكومتك لو عيالي جرالهم حاجة .. وأنا كان نفسي أعلمهم تعليم كويس يطلعوا يخدموا بلدهم بس للأسف أصبحت الدولة المصرية الشمال فيها اللي ماشي واليمين مش اللى ماشى".

وتابع: "أنا هقولهالك على الهواء ومستعد للمساءلة، ياريس أنا بعد 2011 لو كنت عايز أطلع بصاروخ كنت طلعت بس للأسف خفت الله في عيالي بس للأسف فيه ناس باعوا ضميرهم ودخلوا البرشام والمخدرات .. ياريس مركب الهجرة الشرعية دي هي نفس المراكب اللي دخلت مخدرات وسلاح .. ياريس حس بينا .. أنا لما انتخبتك وبعت دهب مراتي كنت عايز أعلم عيالي .. وأنت كدة بتخليهم ينحرفوا .. ياريس الناس بتموت .. والله فيه ناس في الأرياف ما لاقية تاكل ".