"مفيش شغل".. حملة تدعو للإضراب عن العمل يوم 30 أغسطس

دشن نشطاء علي مواقع التواصل الاجتماعي هشتاج تحت عنوان "مفيش شغل " للدعوة لاضراب جزئي عن العمل في 30 اغسطس الجاري احتجاجا علي غياب القصاص والعدل وانتشار الظلم وقرارات الإفقار .
قال النشطاء في بيان تحت عنوان " شارك في الإضراب علشان يشوفوك" :علي فكرة الإضراب مش غلاسه وخلاص ، لأ ده واحد من أهم أسلحة الضعفاء في مواجهة الظلم ، لما يكون في كام ميت ألف واحد شافطين البلد في كرشهم وسايبينا ناكل في بعض يبقي لازم يشوفونا لازم يحسوا إننا لسه موجودين مش نمل مالوش لازمه هم فعلا شايفينك نمله وشايفين ولادك نمل صغير .. علشان ما تحاولش ترفع راسك تاني وتخليك ديما جعان وتخلي ولادك يعيشوا في هم ويموتوا نمل ".
وأضافوا: "لما الغلا والجوع والفقر والمرض وقطع الكهربا والميا بيهد فينا .. وهم مش شايفيين الا نفسهم وقصورهم وشلتهم في القضا والجيش والشرطة ... رغم أننا الأصل .. إحنا اللي بنصحي من الفجر نتوكل بجيوب فاضية علي باب الله ونرجع مهدودين مش قادرين نقف علي رجلينا من الهم والتعب".
وختم البيان :" لما الكام ميت ألف اللي عندهم المصانع والمزارع والوظايف الكبيره .. عايشيين في بحر من الفلوس والرحرحة .. واحنا مكتوب علينا القرف .. يبقي لازم يسمعونا ويشوفونا .. حاول تخليهم يشوفونا ومش هيشوفونا إلا لما نوجعهم .. الكل لازم يحس انه بني ادم مش نمله .. ويأخد حقه المسروق .. 30 أغسطس .. اضراب عن العمل .. مفيش شغل