حالة من الغضب والاستياء انتابت جمهور مهرجان القاهرة الدولى لسينما الطفل، أمس ، بسبب فيلم ماليزى عُرض أمس فى دار الأوبرا ضمن فعاليات المهرجان. الفيلم تضمن مشاهد وصفها الجمهور ب«الإباحية»، حيث يتناول قصة حب بين شاب وفتاة فى سن المراهقة. 15 دقيقة فقط هى المدة التى قضاها الجمهور فى قاعة السينما، انسحبوا بعدها رافضين تقديم هذا النوع من المحتوى لأبنائهم. «سينما أطفال دى ولّا كبار»، «الفيلم وحش جداً وفيه حاجات عيب»، «أنا ولية أمر اتقهرت لما بنتى قالت لى إنها شافت حاجة أنا أخجل منها»، «للأسف البنات حكت لى على مناظر فى منتهى التقزز»، «البنات خرجت لوحدها بعد نص الفيلم ومحدش فكر إن دول أطفال وعيب اللى بيحصل ده»، تعليقات عديدة على الفيلم الماليزى «محسن»، بعضها من طلاب والآخر من أولياء أمور دوَّنوها على مواقع التواصل الاجتماعى، معبرين عن استيائهم من تقديم محتوى خارج لأطفالهم، خاصة أن أغلب حضور الفيلم كانوا من طلبة المدارس الابتدائية والإعدادية. شكاوى عديدة تقدم بها أولياء أمور الطلاب الذين شاهدوا الفيلم للجنة المنظمة للمهرجان، انتقدوا فيها عرض الفيلم ضمن مهرجان الأطفال، منهم ولية أمر طالبة فى مدرسة «الليسيه»، التى قالت: «أنا كنت موجودة مع بناتى النهاردة وطلعت السينما اللى كان فيها الفيلم ده، أنا بصراحة صعقت لما شفت المنظر إزاى مهرجان أطفال يعرضوا فيه حاجة زى دى»، مؤكدة أن المسئولة عن رحلة المدرسة طلبت من منظمى المهرجان تغيير الفيلم: «بس بعد إيه ما خلاص، الولاد اتفرجوا واللى كان كان». من جانبها، قالت سهير عبدالقادر، أمين عام مهرجان القاهرة الدولى لسينما الأطفال، إن وفداً من أولياء الأمور جاء إلى المهرجان للتأكد من صحة واقعة احتواء فيلم «محسن» على مشاهد خارجة لا علاقة لها بعادات وتقاليد المجتمع المصرى، مؤكدة أنهم تأكدوا من خطأ الرواية التى قالها أطفالهم: «الأطفال تخيلوا أشياء مش موجودة فى الفيلم، وأولياء الأمور اعتذروا والموضوع خلص»، مشيرة إلى أن أولياء الأمور الذين أثاروا هذه الزوبعة وقدموا شكوى بخصوص الفيلم للجنة المنظمة للمهرجان جاءوا للاعتذار، مقدمين «بوكيه ورد» على سوء الفهم الذى وقع!
