الثالثة «تابتة»

مفيش وقت، خلاص مصر مش مستحملة، مش مستحملة فشل ولا فساد ولا روتين، كفاية تمثيل، بنمثل إن إحنا بنشتغل، بنمثل إن إحنا بنحب مصر، بنمثل إن إحنا متدينين، بنمثل إن إحنا جدعان، بنمثل إن إحنا مخلصين، بجد كفاية تمثيل، وعلى فكرة مستوى التمثيل هايل ويصل لدرجة الاحتراف، حالة مصر مش محتاجة شرح، حالة مصر محتاجة شغل.. شغل وبس، كفانا كلام ورغى وهرى، كفاية خلافات ونظريات وتقعير وتحديب، البلد غرقان لشوشته فى الفساد، والفساد على كل لون، فساد مالى وسياسى واجتماعى ومهنى وأخلاقى ودينى، منه لله حسنى مبارك ورجالته وكل اللى ساعدوه، ربنا يعاملهم بعدله مش برحمته.. حسبنا الله ونعم الوكيل، ملايين المرضى بالكبد وبالسرطان والفشل الكلوى والقلب والسكر والضغط بخلاف الأمراض العقلية والنفسية، الإهمال والفساد والواسطة والمحسوبية والرشوة أصبحت لغة المجتمع، التعليم باظ، والصحة راحت فى داهية، والاقتصاد فى سلة المهملات، والطرق والكبارى والسكة الحديد والمرور زفت، بجد الله يكون فى عون الناس اللى بيديروا البلد دلوقتى، استلموها خرابة، لكن هنعمل إيه.. هننتظر من الناس دى إنها تشتغل وتغير عشان إحنا ناكل ونشرب ونعيش كويس؟
لا، طبعاً، الناس دى مش هتنجح إلا لما كلنا نشتغل وكلنا نبطل كلام وكلنا نبطل تمثيل وكلنا نعترف بأخطائنا وكلنا نعرف إن فيه ربنا بجد وهيحاسبنا بجد وهيسألنا بجد، لازم نبطل نفاق ورياء وحب الذات، كلنا بنحلف أن مصر فوق الجميع وده طبعاً كدب لأن كل واحد فينا بيحب نفسه أكتر من مصر.. ده لو افتكر إن فيه مصر من أساسه، وعشان ننجح لازم نعترف ونصلح نفسنا عشان نبدأ صح، الناس مش عاجبها الحكومة.. حكومة محلب، الراجل بيتحرك وبيجرى ومبينمشى لكن الإنجازات الناس مش شايفاها، طبعا فيه وزرا تمام التمام وفيه وزرا مش عارفين يعنى إيه وزير، وفيه وزرا مفكرين إن الوزير شغلته التصريحات والكاميرات، عشان كده لازم يكون فيه تغيير كبير وواسع وهادف وعملى وحقيقى، عربة الحكومة عاوزة تغيير كاوتش وضبط زوايا وعفشة وقطع غيار، تقريباً مفيهاش إلا موتور وشاسيه.. ورغم كل ده أنا متفائل، مش متفائل بس أنا متفائل جداً، عشان الريس مخلص وفاهم وقوى وأمين، وقال إنه بيتحمل غلطة ويفوت التانية لكن التالتة تابتة زى ما قال لرؤساء الصحف القومية، معنى كده إن اللى إحنا كمواطنين شايفينه وبنشتكى منه الريس عارفه وفاهمه وعارف هيعالجه إزاى وإمتى، وطبع مصر -بجد- ولادة فيه ناس كتير مخلصة وشاطرة بس عاوزة فرصة، والريس بيقول الناس الكويسة كتير بس إزاى نوصل لهم.. هو ده التحدى المطلوب، البرلمان اللى جاى كلنا خايفين منه ومن تشكيلته وطبعاً من أدائه ومصر مش متحملة أى فشل، خلاص وصلنا لنقطة الخطر، بعدها مفيش مصر، طب نعمل إيه ونبدأ منين؟
نشتغل ونبطل كلام ونبدأ من امبارح.