بالفيديو| "الوطن" على باب وزير الكهرباء.. وجيرانه: التيار ينقطع 5 مرات يوميا و"سيادته" عنده مولدات

سائق أحد سكان العقار: الوزير اتعلق بين السما والأرض بسبب انقطاع التيار

داخل مربع سكني هادئ في شارع جزيرة العرب المتفرع من شارع جامعة الدول العربية بالمهندسين، تبدأ رحلة البحث عن منزل وزير الكهرباء، فلا شيء يميز العقار الذي يقطن فيه الوزير عن باقي العقارات المجاورة، وما إن تبدأ تسأل صاحب أحد الأكشاك على أطراف الشارع، على المنزل، فيتعامل معك بشك وريبة، قائلًا: "معرفش"، ثم يسأل: "أنتم مين؟"، وبمجرد أن يعرف أننا "صحفيون"، فيشير لنا: "المنزل موجود هنا في العقار 45"، ثم يتابع حديثه معتذرًا: "معلش لا تكونوا إخوان ولا حاجة، مش أي حد يسأل على بيت الوزير نقوله، علشان القلق اللي في البلد"، بعدها تبدأ الجولة على باب الوزير.
"النور بيقطع في العمارة هنا بمعدل 3 أو 4 مرات، زينا زي أي عمارة تانية في المنطقة"، كلمات لسرحان علي، السائق الخاص لأحد سكان العمارة، والذي يقضي بحكم عمله أغلب وقته في العمارة، متابعًا حديثه: "حتى لما سكان العمارة لجأوا لشراء مولد كهرباء، فكان من جيبهم الخاص، وده لأن العمارة 11 دور، ولازم يكون الأسانسير شغال طوال الوقت، وإلا الناس تموت لو طلعت سلم زي ده، وكل العمارات هنا في الشارع شغالة بموالدات مش العمارة دي بس، والمولدات السكان بيجبوها على حسابهم".
يحكي "سرحان"، ل"الوطن"، عدة مواقف تعرض له الوزير شخصيًا مع انقطاع التيار الكهربائي، قائلًا: "مرة سيادة الوزير كان طالع في الأسانسير، والنور قطع عليه، وفضل محبوس حوالي 10 دقايق جوه الأسانسير، لحد ما شغلنا المولد وخرج"، ولم يكتفِ بهذا الموقف بل ذكر موقفًا آخر حدث للوزير، عندما جاء محصل الكهرباء، ليحصِّل الفاتورة من منزل الوزير وبقية العقار، وبمجرد أن خرج من باب العمارة المحصل، انقطع التيار الكهربائي".
ويواصل سرحان حديثه: "مش بقول الكلام ده والله علشان أنا شغال في العمارة بتاعة الوزير، بس هو راجل بتاع ربنا، وبشوفه كل يوم ينزل من البيت 6 الصبح، ويدخل العمارة الساعة 12 بالليل، وأزمة الكهرباء زي ما بتسري الناس كلها بتسري عليه هو شخصيًا".
حاجز أمني أمام العقار، المتواجد بداخله أحد البنوك، ورجل يرتدي زيًا مدنيًا يتجول حوله، ليستطلع الحالة الأمنية، اتضح أنه الحارس المعين لحراسة الوزير، والذي رفض الحديث، لأنه غير مصرح له بذلك، إلا أنه نادى حارس العقار "البواب"، ليتحدث ل"الوطن"، حيث أكد إبراهيم محمد حسان، أن التيار الكهربائي يتم فصله عن العقار من 5 إلى 6 مرات في اليوم الواحد، مثل أي عقار في المنطقة.
"الأول النور مكنش بيقطع خالص، إلا أنه دلوقت بيقطع زي أي مكان"، هكذا يؤكد إبراهيم حسان، بواب عقار الوزير، ل"الوطن"، مشيرًا إلى أن الوزير سأله عن معدل انقطاع التيار الكهربائي، فقال له: "بيقطع بسيط"، فرد الوزير: "لازم يقطع زينا زي أي مكان في المناطق الشعبية"، ويكمل "حسان" حديثه: "الجيران بيتكلموا مع الوزير أحيانًا عن مشكلة قطع الكهرباء، وهو بيقولهم إن في محطات جديدة بتتعمل، محطات تحتاج إلى تصليح، وفي تفهم من الجيران، إن الأزمة لن تتغير دفعة واحدة".
"الوطن" تجولت في شارع "جزيرة العرب"، لسؤال جيران الوزير عن معدل انقطاع الكهرباء في المنطقة، فقال أحد المواطنين: "الكهرباء انقطعت سبع مرات يوم الخميس، كانت بتيجي ساعة وتقطع ساعتين، طوال اليوم، وأنا ساكن جنب وزير الكهرباء، لكن محدش مننا ك(جيرانه)، فكر يشتكيله من الكهرباء اللي بتقطع كل شوية، لأن إحنا غلابة، وبنخاف نشتكي ليتقبض علينا، فخوفت أشتكي للوزير الحرس يحطوني في السجن"، أما أحد العمال بعمارة حديثة البناء في الشارع، فقال: "وزير الكهرباء عمارته بتقطع عنها الكهربا زيه زي أي حد، لكن هو عنده مولدات كهرباء، والنور لا ينطفي في عمارته خالص بسبب المولد، البلد دي واخدة على الكوسة يعني لو الوزير مريح عمال الكهرباء، كانوا هيجاملوه ومش هيقطعوا عن بيته الكهربا"، فيما أكد عامل في بنزينة بالقرب من بيت الوزير: "النور بيقطع في المكان كله، بما فيهم عمارة الوزير، وبيقطع حوالي ست مرات، وأيام مرسي كان بيقطع مرة واحدة، وسمعنا أن مشكلة الكهربا هتتحل كمان يومين".
"سامع إن الأزمة هتتحل قريب، وأدينا مستنيين"، يقولها نادر السيد، صاحب أحد الأكشاك في شارع جزيرة العرب، مؤكدًا أن التيار الكهربائي، ينقطع عن المنطقة كلها دون استثناء منزل الوزير من ذلك، إلا أن الأزمة اليوم والأمس تحسَّنت بعض الشيء فلم ينقطع التيار الكهربائي كثيرًا، ويتابع "نادر": "الشتا خلاص داخل، ويأذن الله النور مش هيقطع كتير، والأزمة دي غصب عن الدولة".
"يارب التلاجة متبوظش"، أكثر ما يهم "نادر" في تلك الأزمة، ألا تتلف ثلاجة "الآيس كريم والمشروبات"، حتى لا يتعطل رزقه وتتلف بضاعته، مشيرًا إلى أن زيادة انقطاع الكهرباء هي خطر على "أرزاق ناس كتير"، حسب وصفه.
هاتقول إيه لوزير الكهرباء لو شفته قدامك؟:
مواطنون للوزير: لو الكهربا هاتقطع عندك مرة هاتقطع عندنا 10 مرات:
جيران وزير الكهرباء: "هنشكي مين لمين ده احنا غلابة":