تعاطف جمهور رضوى الشربيني في أول ظهور بعد وفاة والدتها: وجعتي قلبنا

انهيار وبكاء وإغماء، حالات عاشتها الإعلامية رضوى الشربيني منذ وفاة والدتها في أول شهر مارس إثر إصابتها بفيروس كورونا المستجد (كوفيد-19).
رضوى الشربيني تظهر في البرنامج بعد وفاة والدتها
وظهرت أمس رضوى الشربيني في برنامجها «هي وبس» المذاع على قناة Cbc سفرة، بعد وفاة والدتها مؤخرا.
أول كلمات رضوى الشربيني بعد وفاة والدتها
وكانت أول كلمات رضوى الشربيني بعد وفاة والدتها في البرنامج: «في آية أنا بصدق فيها أوي، الآية بتقول: (لَا يُكَلِّفُ اللَّهُ نَفْسًا إِلَّا وُسْعَهَا)، يعني ربنا سبحانه وتعالى مش هيشيل كتف حاجة إلا لو كان ادها، كان عني كابوس لمدة خمسين يوم مش قادرة اتكلم على تفاصيله دلوقتي أو مش عايزة اكلم على تفاصيله دلوقتي، أو مش عايزة اكلم على تفاصيله دلوقتي اقدر اتكلم عليها لما هقدر اتكلم عليها».
وأضافت رضوى الشربيني: «لكن احنا كان لازم نطلع عشان إحنا عندنا رسالة لازم نكملها، كمان كان لازم اطلع عشان أنا نفس الست اللي قعدت خمس سينين بقولكوا (فَإِنَّ مَعَ الْعُسْرِ يُسْرًا إِنَّ مَعَ الْعُسْرِ يُسْرًا)، وأن مهما حصل، مهما الواحد مر بحاجات مش كويسة بس ربنا موجود، اختبار صعب والحياة اختبارات والحياة امتحان وكل واحد فينا عنده امتحان شكل، وكل واحد فينا بيمتحن في مادة شكل، وكل واحد بيمتحن قدر استطاعته، ولا وقتك زي وقتي ولا ورقتي هتنسحب في نفس الوقت اللي ورقتك هتنسحب فيه».
وتابعت رضوى الشربيني: «لكن أنا هي هي الست اللي كنت بتقولك هتعدي، وأنا كمان متأكدة أنها هتعدي بالوقت والصبر والدعاء والصلاة هتعدي، وأنا طالعة النهاردة وأنا عندي الاختيار أو الإمكانية إني مطلعش بس أنا صممت أني اطلع لأن زي ما بشجعك كمان بشجعني، وزي ما قولت من دقيقتين أن ربنا سبحانه وتعالى قال إن (فَإِنَّ مَعَ الْعُسْرِ يُسْرًا * إِنَّ مَعَ الْعُسْرِ يُسْرًا) وقالها مرتين عشان يأكدها، وجزي من يسري الكبير كنتوا انتوا».
رضوى الشربيني توجه رسالة لجمهورها بعد وفاة والدتها
واستكملت رضوى الشربيني حديثها عن جمهورها قائلة: «كم الدعوات الكتير اللي ادعت لأمي الله يرحمها وهي عايشة وهي ميتة، ناس كتير وقفت جنبي أهلي وأصحابي كل الناس اللي في السي بي سي أشخاص ربنا سخرهم عشان يكونوا جزء من اليسر، إحنا بشر وكل واحد بيحصلوا حاجات لازم يصبر عليها ويستحملها حتى لو العقل مش مستوعبها أو القلب مش مستحملها، لكن هو ربنا قال (وبشر الصابرين)، فإحنا لازم نقول الحمد لله، انتوا وحشتوني جدا وأنا متشكرة جدا عشان أنا في الأزمة دي محستش أن اللي انا عملتوا في الخمس السنين اللي فاتوا راح، أنا بشكر كل الناس اللي دعولي ودعو لأمي الله يرحمها وبشكر زميلي وزملائي والإدارة وأهلي والنجوم الكتير في كل حته وبشكر شخص معين هو قاعد يتفرج عليا أنا بشكره».
رد فعل الجمهور على كلام رضوى الشربيني
وتأثر الجمهور بكلمات رضوى الشربيني حيث جاء التعليقات من مستخدمي فيسبوك ب: «حاسة بيكي أمي ماتت من سنة وتلات شهور كانت اختي وحببتي وصحببتي راحت وخدت كل حاجة حلوة معاها الله يرحمها ويغفر لها يارب ويرحم والدتك»، و«ربنا يصبر قلبك اختبار صعب جدا»، «ويعز على قلوبنا حزنك وكلامك ياحبيبتي، قادر ربنا يغير الحزن لرضا و طمأنينة ويربط علي قلبك ويجعل قبر الوالدة روضة من رياض الجنة»، و«وأخيرا طل القمر ونور الدنيا كلها حبيبتي رودي الحلقة النهارده كانت جامدة أوي، الحمد لله ربنا وفقك وداكي القوة والشجاعة زي ما تعودنا منك وقدرت ترجعيلنا يا أحلى حاجة حصلت في دنيتنا».
وتوالت التعليقات ب «متزعليش، أنا كمان مامتى عند ربنا والحياه من غيرها صعبه بس والله ربنا بيهون ربنا عظيم ورحمن رحيم»، و«وجعتي قلبنا ونزلتي دموعنا»، و«ما قدرتش اكمل الفيديو من الوجع»، و«والله دمعتك غاليه علينا أوي»، و«نفسي احضنك واكون جنبك ماحبش اشوك كده».