مش بنخاف

بخاف منك وأخاف منى
واخاف م الدمعة ف الننى
وأخاف لو بكره تاه عنى
وبحلم إنى أعيش إنسان
ملاك وبرىء ومش آسى
بخاف من ضحكة مش صافية
وأخاف من فرحة بالعافية
وحبك هوا يحيينى
واخاف م الظلم لو دايم.
واخاف من شعب مش حالم
وأخاف من مكر جوا القلب
واخاف من جهل مليان عند
ومش بالعند تتحقق أمانيكى
بصبر وحب تتداوى الجراح فيكى
واخبى القلب ف عنيكى
وف عنيكى بشوف علامات
تصحى حنينى بعد ما مات
ولما بخاف بقول يمكن ف خوفى نجاة
أتارى الخوف بيقتل كل شىء بجفاه
ومن تانى أعود ليكى
والاقى نجاتى ف إيديكى
وبإديكى حاجات ياما
حاجات تفرح ومتصانة
فيمشى الخوف ويتدارى.
وتبقى الضحكة عايشانا
ومش بنخاف
مادام نور القلوب متشاف
هنمنع دمعة قلقانا
وتبقى الدنيا سايعانا.
سوا أحباب
ومش بنخاف
ومش بنخاف