الحقهم ياريس!!

فجأة أصبحت مصر كلها بتقول: هات هات، مفيش حد بيقول للشعب ده، خد أبداً؟!
مش دا الشعب اللى قال عليه السيسى إنه محتاج حد يطبطب عليه؟!.. فين الطبطبة يا ناس، الشعب تعب وخلاص هيطلع من هدومه، دا طبعاً اللى عنده هدوم!!
الرئيس السيسى قال إنه -قبل ما ينجح فى الانتخابات- لن يرفع الدعم قبل زيادة الرواتب، عشان يحمى الفقراء، لكن لما قعد على الكرسى -عرف اللى كان عارفه وبيقوله دايماً- الخزانة خاوية على عروشها، الدعم العربى وقف، أو هيقف، الدين الداخلى والخارجى وصل إلى أعلى معدلاته، الناس مش هتلاقى تاكل، والحل رفع جزء من الدعم، ارتفعت أسعار البنزين والسولار والغاز والكهرباء، وبالتالى ارتفعت أسعار المواصلات والمواد الغذائية، وكل ده بيدفع تمنه الفقراء!
مش الفقراء بس اللى قلقوا أو تأثروا، الأغنياء كمان، فوجئوا بضرايب مؤقتة لمن يزيد دخله على المليون فى السنة، وضرايب على البورصة، وفتح باب التبرع الإجبارى، بعد أن بدأ السيسى بنفسه وتم فتح حساب جديد، من غير أن يفهم الناس ماذا تم فى صندوق 306، ولا ما هو دور الصندوق الجديد، المهم أن الذى لا يتبرع أولاً ثم يفهم بعد ذلك، يصبح خائناً.
توقف المستثمرون ورجال الأعمال عن أى استثمارات، بل سارع بعضهم وأخرج فلوسه بره مصر.. نعم لم يكن تصرفهم حكيماً، ولكن رأس المال جبان، وماكينة شائعات الإخوان لا تتوقف، فصوروا الأمر على أنه تأميم جديد!!
أفتح التليفزيون يتأكد لدى إحساس الفقر والتسول وغياب الاستثمار، أغلب الإعلانات تدعوك للتبرع، الفقراء يموتون من الجوع والمرض، تهضم تلك الإعلانات المؤلمة بإعلانات المواد الغازية وخصومات المحمول.. إعلانات تعبر عن واقع مصر المؤلم، فلا يوجد إعلان عن مشروعات جديدة، استثمارات، تشغيل، أى حاجة تفتح النفس يا ناس!!
أيها الرئيس أين أنت؟!
أين المشروعات التى تحدثت عنها، لماذا الحديث دوماً عن الأزمات والاستهداف، ومكائد الإخوان وتقسيم مصر؟!
نعرف ذلك ونصدقك ونقدر دورك ونحبك لذا انتخبناك، وأصبحت رئيساً لمصر، فلماذا لا تمنحنا الأمل؟!
لماذا لم نعرف حتى الآن من هم معاونوك؟! لماذا لا تحدد المشروعات التى تحتاجها محافظات مصر وتدعو رجال الأعمال للمساهمة فيها؟!
أين المشروعات القومية الكبرى اللى هنلتف حولها، نحن فى حاجة إلى حلم وأمل وطبطبة؟!
سيدى الرئيس: لك فى القلب رصيد كبير، ولكن أى رصيد يحتاج لإضافة، وإلا سيتناقص، فمد يدك للفقراء والأغنياء، ولا تغرق فى الأزمات، توقعنا أفكارك خارج الصندوق، فهل تخرج من سجن الأزمات وتلحق بمحبيك قبل أن يصيبهم اليأس؟!