سلمى صباحي لمؤيدي السيسي: كيف تنتخبون مرشح "ما عندوش برنامج" والرئيس "مش هيقود البلد بالمونتاج"

وجهت سلمى صباحي، نجلة المرشح الرئاسي حمدين صباحي، انتقادات حادة للمرشح المنافس لوالدها، عبد الفتاح السيسي، في صورة أسئلة حول عدم وجود برنامج انتخابي له، وعدم ظهوره على الهواء مباشرة في لقاءاته الإعلامية.
وقالت على صفحتها على "الفيسبوك": "لكل صحابي مؤيدين السيسي عندي كام سؤال مش عارفه إجاباتهم أتمنى تفيدوني: "انتو شايفين إللي السيسي عمله في 3 يوليو جميل في الشعب المصري، ولا واجب عليه كرجل عسكري وطني؟"
وأضافت: "في الانتخابات الرئاسية.. إزاي معندكوش مانع تنتخبوا مرشح معندوش برنامج انتخابي؟ طب هتحاسبوه على ايه؟!.. واستطردت "أنا عارفة إن أغلبكوا ممكن يكون مش مع ثورة يناير أصلا، لكن هذه كانت ثورة شعب وراح فيها شهداء واتصاب فيها كتير"، "تفسروا بإيه إن تقريبا كل رموز الفساد في النظام القديم اللي قامت ضدهم الثورة دي وعلى رأسهم مبارك نفسه مؤيدين للسيسي؟".
وقالت نجلة صباحي: "في الانتخابات الرئاسية في العالم كله لما يكون في اتنين مرشحين للرئاسة لازم تتعمل بينهم مناظرة علنية على الهوا قدام الشعب كله، ومش من حق المرشحين الاعتراض أساسا لأن ده حق للشعب.. تفسروا بإيه رفض حملة السيسي للمناظرة! هل ده ضعف ولا خوف من قوة المرشح المنافس!"
وبخصوص عدم ظهور السيسي في لقاءات مباشرة على الهواء، قالت "الرئيس هيكون عايش معانا "ع الهوا" مش هيقود البلد "بالمونتاج" .. تفسروا بإيه عدم ظهور السيسي ع الهوا ولا مره وليه كل لقاءاته ممنتجه؟! وتفسروا بإيه عدم نزوله في مؤتمرات شعبيه وسط الناس مع ان ده تقليد أساسي في اي حمله انتخابيه في العالم ؟ مش يمكن ده يتفسر انه "تعالي" على الناس او عدم ثقه في النفس؟"
وانهت كلامها قائلة: "دي أسئله كتبتها بمنتهى الاحترام ليكم ولمرشحكم لأني مؤمنه إن المنافسه لازم تكون شريفه ونضيفه وعايزه أعرف اجاباتها منكم بمنتهى الذوق.. يا ريت تجاوبوا بجديه في التعليقات وأشكركم على سعة صدركم وخليكو فاكرين الرئيس بيروح وييجي والشعب باقي.. احنا اللي باقيين لبعض".