هو: العواف يا رجاله الجميع: الله يعافيك يا حاج.. هو: والنبى يا جماعة حدش شاف فلسطين؟ الجميع: الله يسهلك يا حاج.. هو: يا عم وانا جاي أشحت منك، أنا بسألك عن الدولة اللي فيها بيت المقدس (أولى القبلتين، وثالث الحرمين الشريفين)، أصل بقالي زمان مش شايفها على الخريطة؟. الجميع: خلاص تعالى فتشنا.. فتشني فتش (يضحك الجيع) هو: إخص.. إخص، هي دي أخلاق المصريين، هو ده المسلم اللي المفروض قلبه ياكله على بيت المقدس، وعلى اخواته الفلسطينيين، اللي متحاصرين، ومش لاقيين اللقمة؟ أحدهم: يا عم النهارده كله مبيفكرش غير في نفسه، هو حد فاضي لهم، كفاية اللي احنا فيه؟ هو: يا جماعة دول ناس بيجمعنا بيهم دين، ولغة، وتاريخ، وبعدين متنساش إن أمننا القومي مرتبط بأمن فلسطين، وده عمق استراتيجي لينا. الجميع: والنبي كلمنا عربي، احنا اللي نعرفه إن بلدنا بتتحارب من جوه ومن بره، والكل طمعان فينا، حتى بعض الدول العربية عايزين البلد دي تخرب. هو: معلش يا رجاله الحمد لله ربنا نجانا، والتاريخ بيقول إن من ساعة ما اليهود حطوا رجلهم في فلسطين، ومصر واقفة جنب الفلسطينيين، غيرش بس الافندي اللي اسمه مرسي هو اللي خاب، وكان هيفرط في غزة، لما عمل اتفاق مع اليهود على تهجير سكانها جوه سينا، ويخليهم يسيبوا أرضهم لليهود؟. أحدهم: طيب الفلسطينيين كانوا هيفرطوا في أرضهم لليهود، مطلوب مننا احنا إيه إن شاء الله؟ هو: أضعف الإيمان انكم تناصروا قضيتهم. أحدهم: حلو قوي.. بتقول قضيتهم.. طيب تقدر تقولنا الأول يا فصيح يطلع مين "أبو مازن" ده؟ هو: "أبو مازن" هو رئيس السلطة الفلسطينية. أحدهم: يعني مش رئيس دولة يعني، طيب تقدر تقول لنا يطلع مين "اسماعيل هنية"؟ هو: "هنية" هو رئيس الحكومة المقالة، وبيتكلم بإسم القضية الفل... الجميع: بس اخرس بأه صدعتنا.. عمال تكلمنا عن رئيس سُلطة مش رئيس دولة، وبتكلمنا عن رئيس وزرا مقال يعني مالهوش وظيفة رسمية، وفي الآخر جاي تسألنا عن دولة اسمها فلسطين.. ده انت عبيط بشكل.