الريس عايز مننا إيه؟

اتجمعت أنا وأصحابى فى كافيه.. وبعد السلامات والهزار بصيت لهم وقلت لهم: إيه بقى هنعمل إيه فى انتخابات الرئاسة؟
واتحول الحوار لأن كل واحد فيهم بقى بيقول طلباته من الرئيس اللى جاى.. ابتدا «محمد»: أنا عايز ريس جامد كده يعرف يسيطر على البلد دى بصراحة بدل الفوضى دى.
أما «وسام»: أنا عايز ريس ذكى يعرف يطور البلد.
فضل كل واحد فيهم يتكلم عن طلباته من الرئيس الجديد وأحلامه.. أنا سبتهم وسرحت.. كل واحد فينا بيفكر عايز إيه من الرئيس الجاى.. يا ترى حد فكر الرئيس الجاى عايز مننا إيه؟!
الرئيس الجاى محتاج إننا نساعده.. إزاى؟!
كلها أيام وكل واحد من المرشحين هيبدأ عرض برنامجه الانتخابى.. ولو تفتكروا أنا الأسبوع اللى فات طلبت منكم تنتخبوا رئيس خبرة.. عنده برنامج وعنده خبرة تخليه يقدر ينفذ البرنامج ده.
الحقيقة إن أى رئيس مش هيعرف ينفذ برنامجه حتى لو عنده خبرة من غير ما يطلب مننا شوية طلبات.
هتقولوا لى إيه يطلب طلبات دى بقى؟ ما اتفقناش على كده!
بصوا يا جماعة تعالوا نتخيل إن الرئيس ده قال إن من ضمن برنامجه الانتخابى رفع كفاءة القطاع الحكومى وتحسين مستوى الخدمات الحكومية.. هيعمل ده إزاى؟ طبعا فى حاجات كتير بس أكيد من ضمنها إن موظفين الحكومة يلتزموا أكتر.. . يعنى يروحوا مكاتبهم فى مواعيدهم ويشتغلوا بكامل طاقتهم.. يعنى من الآخر الرئيس هيطلب منهم طلبات.. صح ولا لأ؟
الرئيس الجاى هيحتاج مساعدتنا كلنا بمختلف تخصصاتنا ونوعية أعمالنا.. أنا دايما باقول لكم إن مافيش رئيس هينجح فى تحقيق برنامجه من غير مساعدتنا. الرئيس الجاى هيحتاج ناس تشتغل.. ناس طموحة ناس عايزة تغير وتتغير.. ناس عندها حلم وعندها إصرار تحقق أحلامها.. ناس تبتكر وتطور.
الرئيس الجاى لو عايز فعلاً برنامجه ينجح ما أعتقدش هيبقى فى مكان لناس كسلانة.. ناس متواكلة.. ناس مش طموحة.. ناس مش عايزة تتعب.
القايمة طويلة على فكرة.. الرئيس الجاى أكيد ليه طلبات كتير مننا علشان نساعده واوعوا تعتبروا ده أوامر.. اعتبروا إنه بيطلب مساعدتنا.
أما بقى الريس اللى هييجى ويقول لكم أنا هانغنغكم، وهاجيب لكم، وأعمل لكم، ويحسسكم ان كل حاجة هتبقى عندكم بس انتوا شاوروا، ومش لازم تتعبوا ولا تشتغلوا ولا تعملوا أيتها حاجة.. هو جاى معاه الفانوس السحرى.. أول ما تلاقوا رئيس كده سيبوه وامشوا.. ده بيشتغلكم نظمى فهمى رسمى.
الرئيس اللى ييجى يكلمكم عن مصر الغنية.. ده رئيس دولة اللالاة لاند.. إحنا مش دولة غنية كده وحتى لو كنا دولة غنية فإحنا دولة عدد سكانها 90 مليون يا ناس يا هووو.. هى دى بقى مشكلتنا فى مصر.. علشان كده الرئيس الجاى هيطلب مننا نشتغل أكتر، نستحمل أكتر، نتعب أكتر علشان نعرف كلنا نعيش كويس.. نعرف كلنا نتمتع ببلدنا.. نعمل مستقبل لولادنا.
لازم نبطل نتواكل لازم نتعلم ان مافيش حلاوة من غير نار.. مصر تستاهل مننا كتير.. تستاهل نخليها أحلى وأحسن.. موظف الحكومة لازم يشتغل ويتعب لو عايز ظروفك تتحسن.. لو عايز مستواك يبقى أحسن لازم تتطور مهارتك.. لازم تبص على موظف القطاع الخاص وتشوف هو إيه عنده مش عندك وتحسن من نفسك.. ما تستناش حد، إنت طور نفسك.. تطوير نفسك هتكون نتيجته إن المكان اللى بتشتغل فيه يتطور ويكبر وده هينعكس عليك إنت أول واحد.
كل مواطن فينا عليه دور لازم يعمله.. لو تقدر تعلم واحد أمى علمه.. لو تقدر تساعد محتاج مد إيدك ساعده... ماتستناش.
أنا مستنية الرئيس الجاى فى أول خطاب ليه يطلب مننا نساعده.. مستنياه يقول إنه من غير مساعدتنا مش هيعرف يحقق برنامجه ولا أحلامنا وأحلامه.. ومستنية إن ساعتها كلنا نساعد الصغير قبل الكبير علشان مصر.