أنا الرئيس المنتخب

شعر

أنا الرئيس المنتخب
أنا اللى فجرت الغضب ف الشعب
ودويت الألم
وأنا اللى شغلت اللى عاطل
وأنا المقاتل
أنا ابن مصر المنتخب ... م الشعب
أنا اللى حبونى الولاد ف المهد
واتسمو باسمى
وأنا اللى وزعت الفرح ع الخلاق
يعنى الفرح رسمى
وأنا اللى جوزت البنات الحور
وساوتهم ببنتى
الدولة منى ومنها أنا بأكتب اسمى
منا الرئيس المنتخب
أنا اللى بيا الشرطة والجيش ليك ومنك
وأنا اللى ذليت اللى يوم فكر يذلك
بعيداً عن سرور فتحى
وضحكت صفوت الخاين
ورقصة عزمى على غنوة بديع
حقك معايا إزاى يضيع
وأنا الرئيس المنتخب
لاعمرى رحت لشرق ولا بصيت لغرب
انت المواطن وابنى وزميل كل كرب
احنا اللى بادينا التحية والسلام
وبدأنا عصر من العمل بعد الكلام
ف عهدى مليون الف مصنع اتبنوا
الناس ف عهدى شبعوا وكمان اتغنوا
وف عهدى رجعوا اتعلموا
وف عهدى كام مستشفى شفت اتجددوا
رجع الأمل للناس ورجعوا اتوحدوا
ما أنا الرئيس المنتخب
أنا الرئيس المنتخب
شرعيتى للناس ومنهم مش عليهم
شرعيتى انى اخدهم من اديهم
شرعيتى فرحة تلون أرض مصر
ما انا الرئيس المنتخب
يا للعجب منك يا شعب
سبع تلاف
تلاتين
سنه
وانتا بتقبل ف التحدى
وانا عند وعدى
معدن دهب
ما انا الرئيس المنتخب
كنا هنبقى أحلى شعب
اغنى شعب
لكن بجد وللاسف
ياشعب مصر المنتخب
الانقلاب هو السبب