فلوكس عن السخرية منه بسبب "الممر": الحملة فشلت والناس حبانا

ألمح الفنان أحمد فلوكس، إلى أن فضائيات جماعة الإخوان الإرهابية، هي سبب الحملة الممنهجة، التي يتعرض لها، على خلفية مشاركته في فيلم الممر.
وقال فلوكس، خلال مقطع فيديو، نشره عبر قناته على موقع الفيديوهات الشهير "يوتيوب": "شوية القنوات المحترمة اللي مش هجيب سيرتها والناس اللي عاملهم أغاني، واللي عملتهم فيديو، شغالين زي الفل عليّ وعلى زمايلي، ابتدوا بأحمد عز وشريف منير، بلاش كلمة الشهيد الحي، خرجوها برة".
واستنكر، أحمد فلوكس، استهزاء المشاركين في هذه الحملة، من شهداء الوطن، بحجة السخرية منه: "دخلت كلمة الشهيد ليه، وشريف منير وقبله أحمد عز ليه؟".
وتابع: "بالنسبة للشباب اللي هرج وضحك، أنا مش زعلان، أنا بهزر وبضحك معاكم، ومن أول يوم لقيت الناس حبانا والمخطط فشل"، ووجه فلوكس الشكر لكل من دعّم الفيلم، والمشاركين فيه، حيث يعتبر أحدهم.
وشدد الفنان أحمد فلوكس، على أن الحملة لم تكن تستهدفه بمفرده: "أنا مش حاجة، ومفيش ممثل حاجة، مفيش حد مخلد، إحنا ناس طبيعية، بنعمل دورنا، وهيجي وقت ونكبر ونموت، وفيه أجيال تانية مش هتعرفنا، وممكن ابني ميعرفش فؤاد المهندس، البلد دي هي الحاجة مش إحنا، الحملة فشلت، واللي بيهرج فإحنا شعب دمه خفيف".
ووجَّه فلوكس رسالة إلى مروجي الحملة، التي يتعرض لها في الفترة الأخيرة، على خلفية مشاركته في فيلم الممر.
وقال فلوكس: "مش هبطل أعمال الأفلام دي، ولا هبطل أدافع عن بلدي أو جيشي".
وأكد فلوكس: "قررت أعمل برنامج مخصوص عليكم، فرد فرد، أنا مبخفش، ولو انت فاكر إنك لما هتعمل كده، زمايلي هيخافوا يعملوا الأفلام دي، تبقى فاهم غلط، لأن الفنانين من الناس، ووقت البلد كلنا بنحب بلدنا".
وشدد فلوكس، على أن هناك عددًا كبيرًا من الأعمال الفنية المماثلة لفيلم الممر، ما زالت في طور الكتابة: "هتزعل جامد أوي ومخططك هيفشل هيفشل".
وواصل: "في موجة جاية، زي الموجة اللي عملتلها فيديو ووقفت، فانتو بتحاول تخرسوا الناس عشان الموجة الجاية، وأحب أبلغك إننا فاهمين كلنا، وإن الناس فاهمة إن اللي انتو بتعملوه ملهوش عازة، محدش فينا بيخاف ولا هيبطل يحب بلده أو يساندها، أو يستخدم مهنته في شيء مفيد لناسه وشعبه، ومحدش هيوقف عمل الخير".
وأكد فلوكس أنه على استعداد لإنفاق كل أمواله على الأعمال الفنية المماثلة لفيلم الممر: "انت فاشل ومش هتعرف تعمل معانا حاجة".