فيديو.. المصريون يردون على دعوات التخريب: مش هنسمحلهم

عرضت قناة "إكسترا نيوز" فيديو تضمن آراء المصريين من مختلف المحافظات في أداء الرئيس عبدالفتاح السيسي، والإنجازات التي شهدتها مصر مؤخرا، ردا على تحريض ومزاعم قناة الجزيرة القطرية وفيديوهاتها المفبركة، بشأن تظاهر المصريين.
وقال أحد المواطنين من مدينة المحلة الكبرى: "الراجل مسيرته لسا مستمرة وبيعمل حاجات جميلة وإنجازات، فربنا يوفقه ويبص للغلابة ده أهم حاجة عشان إحنا قلبنا معاه".
وأضاف آخر: "إحنا بنحب السيسي ومش عاوزين مظاهرات"، وقال إحدى المواطنات: "عشان خاطر عيالنا مش عاوزين مظاهرات.. أنا خوفت على عيالي ومودتهمش المدرسة وخوفت.. طول ما البلد حلوة أدينا ماشيين في أمان".
وتابع مواطن آخر: "إحنا مش عاوزين مظاهرات إحنا عاوزين الدنيا كويسة وخلاص"، وقال آخر: "الناس اللي عاوزة مظاهرات دول ناس حسبي الله ونعم الوكيل فيهم.. ناس مش كويسين، إحنا عاوزين البلد كويسة، والراجل اللي ماسك البلد راجل كويس إحنا استفدنا إيه من المظاهرات، هما نسيوا لما كنا بنتحايل عليه عشان ينزل يحوش عننا وقال اعملولي تفويض وعملناله تفويض، دول ناس ظلمة ومش عاوزين البلد تمشي".
وقال أحد المواطنين: "الدنيا هادية خالص عندنا وإحنا مع الرئيس ومع الاستقرار والأمن، إحنا مش عاوزين خطر لمصر، إحنا عاوزين الدنيا هادية ومش عاوزين بهدلة تاني ولا عاوزين اخواتنا يموتوا، عاوزين البلد في خير وأمان"، وقال مواطن آخر: "إحنا مش عاوزين خراب تاني يا ريّس إحنا ما صدقنا البلد تمشي".
وأضاف أحد مواطني محافظة السويس: "اللي حصل امبارح شوية عيال حرامية عاوزين يكسروا المحلات ويسرقوا ومش هنسمحلهم وهنقف مع الشرطة"، وقال مواطن آخر: "بنقول للرئيس السيسي انت عاملنا كباري وشقق وحاجات كتير، وإحنا مش عاوزين البلد تقع، والبلد مستقرة والدنيا تمام"، وقال آخر: "البلد زي الفل وعاوزين نعيش في أمان، والبلد هادية ومفيش أي حاجة".