م الآخر| مش لازم دبدوب

من صغري أسمع عن أعياد كتير في مجتمعنا الشرقي، عيد أضحى، عيد فطر، عيد العمال، عيد الثورة... ومنها عيد الحب يمكن المعنى موصلش إلا بعد فترة من النضج الفكري، ودايما كنت محتار هو العيد معاده امتى ؟! . يوم 4 نوفمبر ولا يوم 14 فبراير.. اكتشفت فيما بعد إن يوم الاحتفال الرسمي في فبراير، وده بيرجع للرومان وخصوصًا القديس (فالانتين) شهيد الحب والسلام، أما عن احتفال المصريين بعيد الحب في شهر نوفمبر بيرجع إلى دعوة أطلقها الراحلين مصطفى وعلي أمين، رحمة الله عليهما، كنوع من الاحتفال بشكل خاص.
مظاهر الاحتفال بعيد الحب اختلفت وتنوّعت عن طريق الدبدوب الأحمر أو الوردة أم جنيه أو حتى رسايل الحب والاحتفال بيه مبيفرقش بين غنى وفقير أو حتى وزير وكل شخص على اختلاف طبقته الاجتماعية أو مستواه المادي بيقدر يكتشف طريقة للتعبير عن احتفاله وفرحته بطريقة تتماشى مع ظروفه ودايما ويتصدر الكورنيش المشهد بين اتنين حبيبن وتمشية على النيل مع كلمتين حلوين.
وفاكر إنه كان يوم خميس في شهر نوفمبر وكنت في المرحلة الإعدادية ومع أول عيد حب أحتفل بيه.. فاكر الصعوبات اللي واجهناها عشان نلاقي مكان نتقابل فيه بعيد عن عيون الناس.. بعيد عن كلامهم وعن أفكارهم واختياري للهدية اللي فضلت أتنقل من مكان لمكان لمجرد إني ألاقي حاجة بسيطة تقدر تقبلها ونفس الوقت تعجبها، تفاصيل اليوم لعند اللحظة اللي بكتب فيها محفورة جوايا وكأنها شريط بيتعرض قدام عيني، وبرغم إنها كانت أيام مراهقة إلا إنها هتفضل ذكريات حية مع تتابع الأيام وزي كل ذكرى مطبوعة جوا كل واحد فينا.
وللأسف ارتبط مفهوم عيد الحب عند ناس كتير بإنك حتما ولا بد تكون مرتبط أو مغرم ببنت عشان تحتفل باليوم ده!! وبدوره اتضح إنه مفهوم سلبي بيأثر على فكر ناس كتير وبيطغى عليهم بإحساس فيه نوع من الغيرة حتى وإن كان غير واضح وبيحاولوا يمحو أثره عن طريق السخرية بأسلوب ضاحك زي (أنا مسلم والفلانتين أصلا حرام).. ومن غير إطالة السؤال هنا ازاي نقدر نحتفل بعيد الحب حتى وإن كنت غير مرتبط بطريقة غير تقليدية ويكون فيها نوع من الحماسة والفرح وبعيدة عن الفتور والملل ؟! .
الإجابة هتكون وكل بساطة إن الأفكار والطرق كتيرة ونقدر من جوانا نبدع أفكار جديدة وفيها نوع من الحماسة والفرحة، زي إنك في اليوم ده ممكن تصحى بدري تقول لأختك أو والدتك كل سنة وانتي طيبة وتخرجها معاك وكأنها حبيبتك وهي أكيد أحق بالفرحة وممكن تنزل بدري وتشتري ورد وتقابل كل ست بيت وأم بابتسامة طيبة وتديها وردة وتقولها كل سنة وانتي طيبة.. ممكن تشتري كروت مكتوب فيهم (كل سنة وانتي طيبة) وبدون أي إحراج تقف في مكان عام وكل بنت تديها كارت بابتسامة.. هي ممكن تكون محتاجة لكدة فعلا بس مش قادرة تقول، فالفكرة إنك مش لازم عشان تحتفل بعيد الحب تكون مرتبط أو بتحب بالعكس انت ممكن توجد من نفسك بمجهود بسيط أفكار تسعد ناس كتير محتاجة تحس بالفرح ولو كنت بتعيش حالة حب مش محتاج أبدا مناسبة عشان توضح فيها حبك من خلال هدية.