م الآخر| رومانسي ورومانسية.. ولكن

أنواع الحب من وجهه نظر جيل القرن ال21 والأجيال القادمة:
بالنسبة للرجل: هل الحب من وجه نظركم هو عبارة عن:
1- ممارسة الجنس، أي العلاقة الحميمة بين الطرفين والاستمتاع معًا، وبذلك الأمر يكون زواجكما زواج متعة!
2- أن تعجب ببنت ما جميلة وملابسها جذابة ومودرن وروشة.
3- إنك بتحب بنت ما فتعجب بجمالها.. فتحبها عن طريق الجسد وليس من خلال كونها إنسانه لديها روح ومشاعر تمتلكها.
4- تقضي يومين مع بنت قابلتها مثلًا عن طريق غرف الشات أو جامعة أو كافيه أو أي مكان بتقابل فيه أصحابك لمجرد التسلية، وبس يعني من الآخر كده لو جواز استحاله أمشي مع بنت قبلتها وأتعرفت عليها بكل سهولة عن طريق شات أو غيره والآخر نتجوز يبقى أنا كدة ب"أدبس" نفسي رسمي لا شكرًا مينفعش!
بالنسبه للبنت:
1- إنك تتعرفي على شاب متدين فيه صفات الالتزام، محبوب لدى الجميع مش بيفكر إلا في شغله وبس، والبنت اللي هيرتبط بيها.
2- شاب مقطع السمكة وديلها، روش طحن، بيعرف يسليني وأمور ووسيم وبيدلعني دائمًا لما أكون مضايقة أو مبسوطة المهم بكون معاه فرحانة.
3- شاب "سيس" بتاع بابي ومامي، ومعاه عربية تحفة يفسحني بيها في أي مكان، وهو ليا أنا وبس، بس فيه حاجة لو لاقيته خنيق ومقفلها عليا هشوف اللي أحسن منه.
4- شاب على نياته ولا يمتلك شخصية، من الآخر "ابن أمه" عشان أنا أقدر أتحكم فيه وميتحكمش فيا أبدًا.
5- أي شاب المهم يسترني وخلاص لأن خلاص البنات معظمها ب"تعنس" بسبب الظروف المادية اللي بتواجه الشباب، خاصة إنهم مبيشتغلوش عشان يتجوزوا؛ لذلك هو أحسن من غيره أو ممكن أفاضل بين اثنين وفي الآخر أشوف مين الأفضل وفي النهاية نصيبي هو اللي هيختار شريك حياتي وبرضو ممكن متجوزش!