انفراد| في تسريبات قضية التخابر "الشاطر": قلنا ل"العسكري" محدش هيقرب من مصالحكم بعد عقد صفقة معانا

نائب المرشد يحكي لخالد مشعل الصفقة التي حاول عقدها مع المجلس العسكري

قال خيرت الشاطر، نائب مرشد جماعة الإخوان المسلمين، في التسريبات التي انفردت بها "الوطن" في قضية التخابر، خلال مكالمة مع خالد مشعل، رئيس المكتب السياسي لحركة حماس: "قلنا ل"المجلس العسكري إن الهدف الأولاني لدينا إقامة نظام سياسي جديد يبقى مبني على تداول سلمي للسلطة، على انتخابات حرة، على إرادة الناس.. النقطة الثانية إنه يشرع في توفير الظروف المناسبة لنهضة حقيقية في البلد، علشان الهدفين دول احنا مستعدين نضحي بأي حاجة تانية، يعني أي موضوع حد له مطالب، قلقان من حاجة عايز أي حاجة، احنا معندناش مشكلة نتفاهم ونتكلم فيها بلا حدود، وفي نفس الوقت اللي هيقرب منهم هنضحي برضو بلا حدود، علشان تبقى المعادلة واضحة مفيش فيها مجال ل... شغالين عليه بقالنا 70 -80 سنة والشعب كله دلوقتى ومحدش هينفع يضحي بالمسألة ديه، احنا مش بنقول الحكم لينا بس ده نظام سياسي جديد مبنى على أساس تداول سلمي للسلطة، إحنا المرة ديه، غيرنا المرة الجاية مفيش مشكلة وتبقى الانتخابات هى الأصل فيه..".
وأضاف الشاطر ل"مشعل": "قلنا ل"العسكري أيضا إن مصالحكم مزاياكم مشاكلكم محدش هيقرب للكلام ده، وكل الكلام ده قابل للأخذ وللعطا معندناش مشكلة فيه، وده مش من باب إن انتوا بتعملوا صفقة معانا انتوا بتعملوا صفقة مع وطن، وبرضو صفقة مش من باب إن انتوا في مكان ضعف لا، أو إن انتوا ناس متهمين أصلاً علشان نقول صفقة، إنما هي القضية انتوا وضعكوا زي بالظبط واحد تاجر شنطة عنده أولاد، فيه ولد كان شايل معاه كل شغله، والتلاتة التانيين واحد غاوي سفر وواحد غاوي رياضة وواحد غاوي بتاع، وبعدين فجأة الراجل مات فالابن الكبير اللي شايل الشغل ده، هو فاهم كويس أوي إن إخواته ليهم حق شرعي زيه زيهم في الميراث بس هو عايز يتميز شوية.. لأنه.. وفي نفس الوقت مش قادر يتصور وجود نفسه من غير ما يبقى صاحب القرار زي ما كان أيام أبوه".
وتابع الشاطر "احنا مكيفين الموضوع تكييف نفسي ماحناش مكيفينه إن انتوا ناس وحشين، كلامه ل"العسكري"، لا انتوا كويسين ووطنيين وعلى راسنا من فوق وكل حاجة ولازم يبقالكم خصوصية ولازم يبقالكم امتيازات وكل الكلام.. بس قضية انه يتلعب في مسألة إن يبقى فيه نظام سياسي لا يعبر عن إرادة الناس ديه مش مقبولة.. فالحوار كان بمنتهى الوضوح والصراحة اللي في الدنيا مع كل الناس على مستويات مختلفة، ولكنهم لم يقدموا مبررا واحدا لماذا يرفضون تشكيل حكومة ائتلافية، حتى ممكن تقول لي مبرر مش منطقي، بس قول لي مبرر، مفيش".