يا ست الحسن

والطيبة .. يا مالية حياتي بالحكايات
يا رسمة رمش من طيبة .. وكحلك جاي م الفسطاط
أنا واقف قصاد عينك .. ومش شايفك أنا فينك؟
ولفيت لما دوخت في مسجد السلطان حَسن أجمل ما بُنى فيكي ..
يا فارشة على الرصيف هاتي
بدل ع الفرشة ما تباتي
أنا فصالي معاكي لجل إيد غلبان
ومعدوم تحت رجليكي ..
يا ست الحسن أفضالك .. بتوحشني وخدني الشوق
هردها لما أفضالك .. وأرفع راسي تاني لفوق
أنا تايه في سراديبك
هلف لحد ما هجيبك
وسجن القلعة مايخوفش إلا جبان
ماداقش اللمة يوم فيكي ..
عشان أصلك أنا وصلك
وقلبي تملي ينحازلك
وعقرب ساعتي مابطلش يوم تقريص
تٍعب من لفّنا عليكي ..
يا فارشة على الرصيف هاتي
بدل ع الفرشة ما تباتي
أنا فصالي معاكي لجل إيد غلبان
ومعدوم تحت رجليكي ..
يا ست الحسن والطيبة ..