حوارى مع ضيف الجزيرة الدائم

تابعت أمس نقاشاً بين الزميلين الصحفيين ب«الأهرام»، أمانى القصاص، وسامى كمال الدين عبر موقع التواصل الاجتماعى فيس بوك.. حين كتب سامى: «انتظرونى على الجزيرة مباشر بعد قليل» واشتعل حوارهما، وقال سامى: هاتيلى قناة مصرية أقول فيها رأيى وأنا آجى.. وهنا تدخلت لأقول له أهلا بك وأنتظرك فى برنامج «مصر الجديدة» مع معتز الدمرداش الذى أترأس تحريره، وإلى نص ما دار:
Amany Elkassass: وهتتكلم عن كلاب الناتو زى القرضاوى القطرى وغيره من أسياد المتطرفين ومموليهم لمصلحة أمريكا وإسرائيل
Samy Kamal Eldeen: أنا مش م اللى خرجوا لتأييده لو عندك قناة ف مصر تخلينى أقول رأيى ابعتيلى.
Samy Abdelrady: تعالى وأنا أطلعك ضيف بكره أو السبت أو الأحد أو الاتنين.. اليوم اللى تختاره.. ولن يراجعك أحد فيما تقول.. أنتظرك.. وإنت تسأل.
Amany Elkassass: هاتى لى قناة.. أنا أهوه باقول لك تشرف يا سامى.
Samy Kamal Eldeen: أوك مستنى تليفونك ع الهوا
Samy Abdelrady: عشان نبقى جبنا من الآخر يا سامى.. مبحبش إلا.. الأبيض أو الأسود تعالى وحدد الموضوع اللى عايز تتكلم فيه وهاحط لك قايمة بالضيوف تختار منها من يرافقك فى النقاش.. هل أنت جاد؟
Samy Kamal Eldeen: أنا محدد الموضوع يا سامى وكلامى واضح ما بامسيكش العصاية من النص وتليفونى عندك قلتلك وموضوع ما قام به الجزار عبدالفتاح السيسى من مذابح فى مصر وتدميره للدور الوطنى للجيش المصرى أنا جاهز.
Samy Kamal Eldeen: هو إنت ليه يا سامى مصر آجى؟!
قلت لك دخلنى تليفونياً أولاً.
Samy Abdelrady: إيه المانع لديك وليه ماسك فى قصة التليفون.. ليه ماسكين فى الجزيرة.. فيه إيه فلوس ودولارات.. ولا أنت عايز تقول رأيك. تعالى وانسى قصة التليفون لأنها فشنك.
Samy Kamal Eldeen: أو عندى حل اعمل برومو للحلقة أبعتلك العبارات وأنا هجيلك ورا البرومو فوراااا
Samy Kamal Eldeen: اعمل برومو وأبقى عيل لو مجيتش
Samy Kamal Eldeen: اكتب لك عبارات البرومو:
- هل ادت مجازر السيسى إلى تأخير مصر أكثر من أربعين سنة أم أخرتها عدة قرون فى الواقع؟
- هل عدد شهداء رابعة ألف فقط، كما صرح حازم الببلاوى فى «المصرى» أم انهم أكثر من خمسة آلاف، كما أكدت مصادر حقوقية دولية محترمة.
- لماذا لا يرد السيسى على المقالات التى نشرت فى صحف عربية وأمريكية تؤكد أنه ابن يهودية، ولماذا طالب إيهود باراك بدعم السيسى؟
Samy Abdelrady: تعالى لو إنت جاد.. البرومو والشغل ده ما تخاف عليه.. ده شغلتى من 9 سنين.. ما تشغلش بالك
Samy Kamal Eldeen: أوك اعمل البرومو وورينى شطارتك وأنا هاجى وتانى يوم هكون عندك ورينى بأه الحرية
Samy Abdelrady: يا سيدى إدينى إمارة إنك جاى.. والل إنت عايزه أعمله وأنا برنامجى على الهواء.. مش مسجل.. لا رقيب ولا حسيب.. تعالى.. تعالى
Samy Abdelrady: البرومو أهو.. ما حقيقة ظهور الإعلاميين والصحفيين المصريين على قناة الجزيرة.. لماذا يتهمهم البعض بأنهم خونة وعملاء.. ما حقيقة ما يرددونه وهل يحصلون فى الحلقة الواحدة على 3 آلاف دولار.. ما حقيقة ما يقولونه.. هل يقبضون أموالاً من الشيخة موزة.. أم يدفع حمد بن جاسم من ثروته.. انتظرونا فى حلقة خاصة الصحفى ب«الأهرام» سامى كمال الدين والكاتب الصحفى عبدالحليم قنديل.. الليلة فى مصر الجديدة مع معتز الدمرداش على الحياة
وهنا توقف الكلام؟!