كل الناس بتحلم بشغل أو بجواز أو بمكانة اجتماعية أو بفلوس كتير..
كل واحد فينا له حلم وهدف عايز يوصل له ويحقق ذاته ويبذل أقصى جهد عنده علشان يوصل للهدف ده.
بس مين قال إن الشغل أو الجواز أو الفلوس هدف؟
فى راجل بيشتغل علشان يبقى معاه فلوس كتيرة ويبقى له مكانة اجتماعية بين الناس، وفى بنت كل هدفها فى الحياة إنها عايزة تتجوز حتى لو كان أى شخص، بس هى راسمة طريق حياتها كله بالجواز!
بس لو ركزنا فى حياتنا هنلاقى إن كل أهدافنا ما هى إلا مجرد وسيلة، والوسيلة وراها شئ تانى وسيلة لحاجة تانية.
يعنى الراجل اللى بيشتغل وفاكر إن هدفه الفلوس غلطان، لأن الفلوس مجرد وسيلة.. وسيلة إن يدخل ولاده مدارس كويسة، ووسيلة إنه يعيش أحسن، ووسيلة إنه يحقق كل اللى نفسه فيه!
والبنت اللى كل هدفها فى الحياة الجواز ودايما مش بتفكر غير فى كده.. الجواز وسيلة مش هدف!الجواز وسيلة لتعمير الكون ووسيلة لتربية أولادها، وإنها تشوف ولادها أحسن الناس وإن يبقى فى ود ورحمة بينها وبين جوزها، وإنها تعيش مع الراجل اللى حلمت معاه بكل خطوة فى حياتها.
الفرق بين الهدف والوسيلة إن الهدف لازم نحققه حتى لو بطرق غير مشروعة، وإن الراجل ممكن يفكر فى طرق غلط يجيب منها الفلوس، والست تفكر فى أى طريقة مهما كانت للجواز وفاكرين إنهم كده حققوا غايتهم من الحياة! لكن الوسيلة مش نهاية الكون لو ما اتحققش، وإن لو بطلنا نشغل تفكيرنا بحاجة اللى فاكرينها هدفنا هنلقى نفسنا بننجح فى حاجة كانت بعيدة كل البعد عن الهدف المزيف.