الراجل ده شكله سعيد ومبسوط جدا فى حياته وكل شوية ينزل صورة على السوشيال ميديا وهو حاضن ابنه ومراته.. يا بخته!
الست دى مبسوطة جدا فى شغلها وزمايلها فى الشغل على طول بيتصوروا سوا والدنيا شكلها جميلة قوى فى شغلها.. يا بختها!
البنت دى متجوزة وكل شوية تنزل صورة وهى بتحضن بنتها وشكلهم على طول كده فرحانين والسعادة مرسومة على وشهم.. يا بختها!
كل ما نشوف صور أو أى حدث حصل لأى حد نقعد نحسد ونقول يا ريت كنت أنا مكانه أو مكانها.
بس..
لو نعرف إيه اللى ورا الصور دى جايز كتير مانتمناش اللى هما فيه ونقول الله يكون فى عونهم.
الراجل اللى على طول بيتصور مع ابنه ومراته ودايما حاضنين بعض ده جايز يكون ابنه تعبان جدا وبيحاول يخفف عنه المرض، أو ممكن يكون هو نفسه اللى تعبان وبيحاول يشبع منهم لآخر لحظة.
الست اللى أول ماشوفت صورتها وقلت إنها مبسوطة فى شغلها دى جايز يكون جوزها اتوفى واضطرت إنها تنزل تشتغل علشان تصرف على أولادها وبيتها..
حتى الست المتجوزة اللى على طول حاضنة بنتها دى جايز تكون مش مبسوطة فى الجواز، وإن ربنا رزقها براجل مطلع عنيها وبتحاول تبين لبنتها إنها سعيدة علشان البنت الصغيرة متحسش بتوتر فى العلاقة بين الأب والأم.
مش دايما أحساسينا ومشاعرنا فى الصور بتكون حقيقية، وفى الأغلب بنضحك فى الصورعلشان بنحاول نخبى وجع يخصنا أو يخص حد بنحبه.
هما قدروا يخبوا الوجع اللى جواهم حتى لو لجزء من الثانية اللى هى مدة التقاط الصورة، بس هيرجعوا تانى للواقع بتاعهم.. اللى لو إنت عرفته مش هتتمنى تكون فيه!
بس لازم كلنا نضحك فى الصورة علشان الصورة تطلع حلوة.