يا مصر يا واخدة ع العبور

مصر يا واخدة على العبور
سواعد ولادك إشارة مرور
للمجد للعزة لتحقيق المحال
لانتصار ع الصعب بإيدين الرجال
يا صاحبة حضارة من غير غرور
يا واخدة دايماً ع العبور
يا مصر على مر الأجيال
ليكى رواد فى كل مجال
ملايين عُلما وملايين عمال
بيعدوا كل الجسور
علشان أبطال عبور
فى الطرب كوكب هزت قلوب
وفى الطب ابنك ابن يعقوب
وتاريخ جوة الهرم مكتوب
وع المسلات بحروف من نور
بيحكى حكايات عبور
مكانك فى العلالى محجوز
ومن قبل زويل ومحفوظ
ياما نبتت أرض الفيروز
رجال أشد م الصقور
قادرين دايماً ع العبور
ذكرك المولى فى قرآنه
وحفظ شعبك العهد وصانه
وعرف من النبى مكانه
محروسة يا مصر فى كل العصور
وقادرة دايماً ع العبور
بلدنا طول عمرها حرة
بعد سنين ضنى مرة
قامت بالثورة الكبرى
بدلت الضلمة نور
عشان تقدر ع العبور
فاضل عبور جيل الثورة
لجمهورية عزيزة حرة
يحكمها ولأول مرة
ريس اختاره الجمهور
لاجل ما يحقق العبور
محمد نصر الدين أبوالسعود
حدائق القبة - القاهرة