عتاب طويل

بحبك
لكن انتى بتحبى مين
بحبك لما بناديك
وأقولك يا ست الكل
يا منورة دارنا
وحامية حمى جارنا
بعطر الفل
بحبك فى صوت غناويك
حكاويك عن أمنا الغولة
والسندريلا والشاطر حسن
ابن الشاويش حسنين
وعن اللى اختشوا ماتوا
م الكسوف واقفين
بحبك
بحب بيوتك اللى
للسقوط آيلين
وعمايرك الفرعة
وفيللك الهايلين
بحبك
بحلك نجوعك وعزبك وعششك
اللى م الصفيح والطين
بحب جلاليبك عباياتك
قفاطينك وحتى بناطيلك
اللى على وسط البنات ماسكين
بحبك يا أم العيون عسلى بلون قصبك
سودة بلون قهرك
زرقة بلون بحرك
خضرة بلون زرعك
خلطة بلون رملك
والزيتون والتين
بحبك
بحب اللهفة والضمة
وصوت مهجتك لما
تقول بالحق العور أعور
ومش خايفين
بحبك
بحب صوت قواشيطك
وزهرك وفناجيلك
وقهاوى على نيلك
للصباح صاحيين
بحبك
بحب مشرفة ومجدى
وطهطاوى مع شعراوى
وأحمد ابن زويل
بحبك
حتى فى خسوفك
وفى كسوفك بحبك
وانتى متعايقة
وفى الأنزحة لايقة
وتمشى تتمايلى فوق نيلك
وبين شطين
وأبوس إيدك لما تمسحى
دمعة التايهين
بحبك فى صوت رفعت
وف أدان طوخى
أجرى عليكى ألحقك
قبل ما تدوخى
أرقيكى برب الفلق والناس
يحموكى من شياطين العين
بحبك وتدينى ضهرك
وأتوه وأحتار أنا فى أمرك
وييجى صوتك على بالى
أجرى أسمع شكاويكى
مكاويكى
أبكى وافتعل بيكى
ولما أشكى أنا حالى
ألقاك تكشرى نابك
وتتعالى فوق عمرى
وللدنيا تسيبينى
تخبط فيا شمال ويمين
كل ده عشان قلت لك
بحبك ورب الكرسى
وسيدنا النبى والمرسى
والأوليا الصالحين
ولا عشان قلتلك
لفين رايحة
وإحنا لفين رايحين
عايدة البصيلى
كفر الدوار - بحيرة