"إنت ما بتعرفش تمثل"دي أول كلمة سمعتها لما قررت أني أمثل، كان في 2003 على ما أتذكر، يومها المخرج ضحك ضحكة صفرا كده وقال لي حرفيا قدام الممثلين وأنا واقف بعمل الدور "إنت ما بتعرفش تمثل يا حبيبي، أنا هدي الدور لواحد غيرك وتعالى بعد بكرة أقعد مع الجمهور عشان تتفرج علينا".
يومها روحت بعيط طول السكة، يومها حسّيت إني فاشل، يومها ماجاليش نوم، بس يومها برضه قررت إني مش هسمح لحد مهما كان مين يقول لي على حاجة أنا عايز أعملها ما تعملهاش، ويومها برضه اكتشفت إني لازم أنجح، مش عشان انتقم من المخرج ده، لأ، اكتشفت إن الأهم إني أنجح عشان أثبت لنفسي إني قادر أكون زي ما أنا عايز، اكتشفت إن هو ده الصراع الحقيقي، الصراع اللي بيني وبين نفسي، قررت إني كل يوم هشتغل على نفسي، هجتهد، هتعلم، همثل، همثل وبس، وقد كان.. بعد 3 سنين في الفريق أخدت جائزة أحسن ممثل، وبعد 4 سنين كنت مخرج الفريق ده، ولحد النهارده.
مرة زمان قوي كنت قاعد مع أمي بنتفرج على فيلم "مافيا" وقلت لأمي "أنا في يوم من الأيام همثل مع منى زكي"، ضحكت وقالت لي "مني زكي مرة واحدة، طب قول تتصور معاها أو تقابلها"، عدى الزمن والسنة اللي فاتت مثلت معاها وحكيت لها عن الموقف ده، وأمي لما رجعت حكيت لها برضه، بس المرة دي ضحكت وعينها مليانة فخر بيا.. ومرة زمان كنت بتفرج على مسرحية قهوة سادة، ويومها نمت وحلمت إني واقف على المسرح ده والنَّاس بتسقفلي، واتمنيت إني ولو يوم واحد أقف أمثل عليه، بعديها بمدة طويلة وقفت على المسرح ده 270 يوم ورا يوم الناس بتسقفلي.. ومرة قبل ما أسيب الشغل واحد صاحبي قال لي "إنت اتجننت هتسيب شغلانة زي دي -في أحد الفنادق المعروفة جدا- وهتروح عشان تدرس تمثيل؟ والله ما هتوصل لحاجة.. إنت عارف في كام واحد عايز يمثل؟ إنت كده هتجري ورا سراب وصدقني مش هتوصل لحاجة"، من شهر كده كلمني هو وغيره كتير عشان يباركوا لي ويقولوا لي قد إية هم فخورين بيا، وبيقولوا ده صاحبنا اللي في التلفزيون ده.
أنا سيبت الشغل وفي فترة ما كانش معايا فلوس، وحاجات تانية كتير ضحيت بيها عشان أعمل حاجة بحبها، ماهمنيش الناس عايزاني أكون إيه، ماهمنيش المستقبل والوظيفة أم دخل ثابت، ماهمنيش كلام فلان وعلان، سديت وداني وطلعت أجري على حلمي، ومن ساعتها مابصتش للحظة واحدة ورايا.. الحمد لله النهاردة أنا ممثل في واحد من أهم البرامج الكوميدية في الوطن العربي Saturday night live بالعربي، وعملت فيه 3 مواسم وأكتر من 150 شخصية تمثيلية مختلفة.
الحمد لله أنا رمضان اللي فات مشارك في مسلسلين "الحساب يجمع" و"ريح المدام"، وتم اختياري من قبل 3 مواقع وصحف ضمن أفضل الوجوه الشابة في رمضان 2017، ده غير الحمد لله النهاردة أنا اشتغلت مع "شريف عرفة، ومروان حامد، وعمرو سلامة، وهادي الباجوري، وخالد جلال" وغيرهم، ومثلت قدام معظم نجوم مصر، النهاردة على ما أعتقد كل اللي يعرفني فخور بيا وباللي وصلت له.. أنا عارف إني لسه بحط رجلي على أول سلمة في الطريق، وقصتي ما تعتبرش حاجة، فيه قصص كتير تانية مليانة شقى وتعب ونجاح، وعارف إني لسه قدامي كتير قوي من أحلام وطموحات وأهداف تتحقق.
كل اللي أقدر أقوله إن مفيش جدال على إن الدنيا هتحاول مرارا وتكرارا تكسرك، الناس هيحاولوا يشدوك لتحت، محدش هيسمعك، الناس ممكن تتريق عليك، بس وإية يعني، مهما حصل سد ودانك واجري، حاول مرة واتنين وعشرة ومية ومليون، مفيش حاجة مستحيل طول ما أنت بتحاول وتسعى، وتجتهد وتتعب وتصبر، كل حاجة ممكن تتحقق، خلى سقفك السما، أي سقف فوقيك كسره وطير.. الأحلام بتتحقق لما نكون عايزينها تتحقق، عايزينها بكل حاجة فينا، بقلوبنا وبعقولنا وبروحنا وباجتهدنا وبصبرنا.. لا تستسلم أبدا ربنا عنده الوقت اللي هينور عليك فيه مهما كانت الدنيا ضلمة.