عايزة حقى

عايزة حقى فى الحياة
عن عمر ضاع صباه
وشباب راح تاريخه
واتشطب
عايزة حقى م الجراح
واللى راح جرى وتعب
عايزة طفولتى واللعب
ورصيد مرحى اللى اتسحب
عايزة حقى فى التاريخ
اللى فات
والأمل اللى مات
عايزة حقى اللى اتنهب
عايزة حقى فى الحنان وفى الأمان
عن دموع سالت زمان
م الجفا
عايزة حقى فى الوفا
اللى اتسرق واختفى
عايزة حقى فى نجم عالى
كان زمان يسهر يلالى
وم الحزن انطفى
عايزة حقى فى الموانى والأوانى
والمبانى والشواطئ والساحات
عايزة حقى فى السياسة والرئاسة
والترشيحات
عايزة صوتى يجلجل
فى البرلمان
فى خد وهات
عايزة دورى فى الإصلاحات
والترميمات
عايزة حقى حتى
فى غزل البنات
عايزة حقى فى المطر
والشجر والشمس والقمر
والليالى والسهر
عايزة حقى فى الخضار
والعمار والجناين والثمار
حق النهار اللى انتحر
عايزة حقى فى النسيج
وفى الأريج وفى الزهور
حقى فى السواحل والقصور
حقى فى المنح وفى الندور
عايزة حقى فى الملاحة
والسياحة وم البجاحة
عايزة حقى فى الآثار
والقنال والرمال
اللى بلون الدهب
عايزة حقى اللى اتغلب
على إيد شلة من الغجر
عايزة حقى من مبارك
من سوزان ويّا جمال
حق صافى حلال
خالى من السوسة والعطب
عايزة حقى فى البراح
والسماح اللى اتسلب
عايزة حقى بالقانون
عايزة أعزف ع الآنون
وأغنى صابرون
إحنا يا خلق الصابرون
عايزة حق الوطن
اللى سابوه للفتن
نار بتاكله وتنتشر
عايزة حقى فى الرغيف
وفى نيل صحى نضيف
عايزة حقى فى القطاع
م اللى اشترى واللى باع
تاريخنا برخص التراب
عايزة حقى م العذاب
اللى عشش فينا وغاب
كام سنة
حق الغلابة الطيبين
الشحاتين المحرومين
م الحنية والهنا
عايزة حق العيانين
فى الطب والدوا
عايزة حقى فى النسيم
القليل والهوا
عايزة حقى م الشهامة اللى ماتت
والنخوة اللى تاهت
وبعدت عننا
عايزة حقى فى الأنا
وإنى أنا.. أبقى أنا