استمرارا لمآساة "أطفال الشوارع"..فتاة تصاب بإيدز بسبب الاغتصاب المتكرر

في تدوينة جديدة مثيرة للجدل كعادته، روى الدكتور حاتم البنا قصة "فتاة شارع"، جاءت بها سيدة إليه ليعالجها من آثار إعياء واضحة عليها.
واكتشف الدكتور حاتم العديد من المفاجآت، منها أن الفتاة حامل، وأنها ليست متزوجة، وأن الحمل من تعدد العلاقات الجنسية التي كانت مجبرة عليها في البداية "اغتصاب" ثم استسلمت لها في النهاية، وأنها مصابة بالإيدز.
"جاتلي من كام يوم واحدة ست شيك فى آواخر الأربعينات ومعاها بنت حاجة وعشرين سنة، من ملابس البنت وشكلها واضح أنها عايشة في الشارع... المهم الست دى كانت ماشية وشافتها صعبت عليها جابتها تكشف عليها المهم كشفت عليها كشف ظاهرى كده البنت واعية كويس وبتفهم كويس مش متخلفة عقليا يعنى، وهى متعرفش أهلها، هى طلعت لقت نفسها فى الشارع، طبعا جسمها كله سحجات خفيفة كده، وشكيت من الكشف إنها حامل، لأن بطنها كانت كبيرة شوية، سألتها انتى متجوزة؟ قالت لا، استدعيت دكتور النسا عملها سونار وفعلا طلعت حامل فى أربع شهور ومكانتش تعرف، وقالت إنها كانت حامل قبل كده وسقطت فى الشارع كده من غير أي رعاية طبية. سألتها مين والد الجنين، قالت معرفش، فى كذا حد بيعتدى عليها جنسيا وهى كانت بتقاوم زمان بس لقت إنها بتتضرب وتتعور وفى الآخر بياخدوا اللى هما عاوزينه (على حد تعبيرها) فمبقتش تقاوم، وعلى حد وصفها إنهم بالمئات، لأن كل واحد كان بينجح إنه يعمل معاها حاجة كان المرة اللى بعدها بيجيب أصحابه معاه، وأصحابه يجيبوا أصحابهم، البنت حالتها الصحية زى الزفت حرفيا، عندها نزلة شعبية، وطبعا أمراض جلدية، درجة حرارتها عالية، وغيره وغيره من البلاوى. طبعا عملتلها حبة تحاليل شاملة كده صورة دم ووظايف كبد وكلى وتحاليل فيروسات كبد وغيره من التحاليل اللى بتعملها لحد جاى من الشارع. خلصت وكتبت للست روشتة مبدئية أعالج فيها الحاجات الظاهرة لغاية ما نتيجة التحاليل تظهر وتيجى نكمل العلاج. الست مشكورة تكفلت بكل الأمور المادية وتعهدت برعايتها إلى أن تجد مكان يتولى أمرها، كل القصة المأسوية دى مش هى السبب إنى بكتب البوست ده ... لأن وللأسف أنا مش أول ولا تانى ولا عاشر مرة أشوف حاجة زى كده، ومعتقدش إنها آخر مرة...
أنا بكتب البوست ده لأن التحاليل طلعت، البنت طلعت HIV+ve، البنت طلع عندها إيدز !! أنا بكتب البوست ده عشان لو أي حد مسؤول شافه لازم كل الشباب اللى فى المنطقة اللى البنت دى كانت موجودة فيها يتعملهم screening tests أول تحاليل إيدز، خصوصا سواقين التكاتك من الشباب، لأنها قالت إن معظمهم كانوا سواقين تكاتك وأصحابهم. ياريت ياجماعة شير لغاية مانوصل لحد. المعلومات الخاصة باسم البنت ومكان تواجدها والمنطقة اللى المفروض يدوروا فيها على الشباب دول أنا شيلتها للحفاظ على خصوصية المريض وهى متوفرة لأي مسؤول يحب يتصرف وياخد خطوة فى الاتجاه الصحيح".