الفتة الفتة الفتة.. ضحك بالخل والتوم

طبق اليوم من أيام الخير
مكرونة بالبشاميل وسَقَط الخروف
* المقادير:
= شوال مكرونة- نص شوال دقيق- 10 كيلو لبن- قفص بيض- شيكارة ملح- قُفّة فلفل- برميل سمنة بلدى- 15 كيلو لحم مفروم من سَقَط الخروف- نص ليَّة سايحة.
* الأدوات المطلوبة:
= جرادل وخراطيم وطشت للمياه، ونش بلطة، خلَّاطة أسمنت لتقليب المقادير.
***
أحمر على سمين
* شُفت المعلم حسونة الجزار؟
- ماله؟
* لما شاف واحدة «تخينة» ولابسة فستان أحمر؟
- عمل إيه؟
* قال لها: أموت فى «الأحمر على السمين»!!
* * *
حتة على الفحم
* شُفت الولية مرات عبده الكبابجى؟
- مالها؟
* ممشية بيتها بالجهود الذاتية.
- إزاى؟
* يعنى مثلاً تطبخ على الفحم.. وفى الصيف تستخدم المراوح الريش اليدوية بَدَل التكييف.
- وإيه يعنى.. دى مرات الحاج سيد الحاتى أجدع منها.
* إزاى؟!
- بتدعَك ظهر عيالها «بالنيفة»!
* * *
ابن الكبش نطَّاح
* الواد ابن المعلم فتحى صاحب المسمط طِلِع صايع أوى!
- إزاى؟
* أبوه بَعَته يفك عشرة جنيه، تعرف رجع قال له إيه؟
- إيه؟
* قال له مفيش «فَتَّة»!
* * *
عسكرى حِدِق
* طيب إنت شُفت الواد صابر عسكرى الأمن المركزى؟
- ماله؟
* لما جابوا له الشوربة عمل حاجة غريبة جداً!!
- عمل إيه؟
* مارضيش يشربها إلا فى «الخوزة»!
* * *
«وضان» موسيقية
* المذيعة للكحيان: تحب تسمع إيه؟
الكحيان: لحمة يا دنيا لحمة.
المذيعة: إنت نسيت أن موضوع الحلقة عن الضانى؟
الكحيان: خلاص.. اسمع وضانى ضانى ضانى/راجعين أنا وانت ضانى.
* * *
جزارة ستيشن
* بتاع «بلاى ستيشن» فتح محل جزارة.. أول يوم خَلصت اللحمة.. عَلَّق ورقة كتب عليها «جيم أوفر».
* * *
واحد شوربة
* الواد عبده شَكْله محروم من اللحمة يا جدع!
- إزاى؟
* رُحنا عزومة على خروف، ما صَدَّق هَبَر اللحمة، وغِرِق فى الشوربة السمينة!
- أكيد كانت حلوة.
* هاهاهاهاااااى.
- بتضحك على إيه؟!
* أصل من كُتر الشوربة اللى شربها، حَصَل حاجة غريبة واحنا راكبين الميكروباص.
- حصل إيه؟
* السواق بيسأله نازل فين؟.. تعرف قال له إيه؟
- إيه؟
* قال له نازل (شوربا) الخيمة!!
* * *
كبشة حظ
* برج التيس: لا تلتفت لمن يستفزك بعبارة «الفلوس مع التيوس».
* برج العَنْزة: تعانى من آلام فى «فُم المعزة»!
* برج النعجة: يجب وقف الريجيم فوراً، فكل جسمك بيخِس ما عدا «الليّة»!!
* * *
خبر عاجل
* استكمالاً لخطة الحكومة الهادفة إلى توفير طبق شوربة لكل مواطن عن طريق إنشاء خزانات ضخمة للشوربة.. قررت وزارة الإسكان إنشاء محطات رفع على المواسير الممتدة من الخزانات، لضمان وصول الشوربة للأدوار العليا.
* * *
بهاريز القافية
* «السواق» قبل ما ياكل الفتة «يلِف الصينية»!!
* «مهندس الكمبيوتر» يدِس إيده فى الفتة، ويعمل «سيرش» على اللحمة!
* أى بنت تحب ترتبط «بالجزار» لأنه ابن حلال «مشَفِّى».
* مرات «ظابط الأمن المركزى» ترُش له على وِش الفتة «خرطوش»!
* مرات «الصايغ» تحط له «فَص» توم بيلمع على وش الفتة.
* «العجلاتى» يبَرَّد الشوربة «بالمنفاخ»!!