ماجدة الرومى للراحل "ملحم بركات": راح نلتقي

نعت الفنانة اللبنانية ماجدة الرومي، الموسيقار الراحل ملحم بركات الذي وافته المنية الجمعة الماضي، بكلمات مؤثرة على حسابها على موقع التواصل الاجتماعي "فيس بوك".
وقالت الفنانة اللبنانية: "من ماجدة الرومي إلى ملحم بركات، امبارح، من عَزا أمي للعَزا فيك ومن دير القرقفي كفرشيما لكنيسة مار بطرس وبولس كفرشيما قطعت المسافة بضيعتنا الصغيرة، وأنا قلبي عم يعصرو الأسى وأنا عم بسمع صوتك طالع من كل شارع وحي وصوتك نفسو نفسو يا ملحم يلي فرّحني العمر كلّو مبارح نفسو نفسو ما ترك بعينييّ دمعة وحدة إبْكِيها".
وتابعت: "وهي نفسها شوارع كفرشيما يا ملحم يلي تمشّينا عليها بضيعتنا صغار وزهّرتلنا صغار وضحكتلنا صغار وهديتنا كل ربيع وكل أمل هيي نفسها نفسها مبارح شفتها خريف حزين مستعد يرمي كل وراقو ويبكي معنا ويكتب معنا ع صفحة تشرين الأول 2016: (كلّو رايح وج الله بس وحدو اللي باقي).. وشفت الدنيا حزينة عليك مثلنا وبتحبّك مثلنا ورح تشتقلك مثلنا وتقول لكل جيل جايي بعدنا إنك من أعظم الاصوات يلي مرقت على هالشرق إنك صوت إذا رَق".
وأضافت: "بيبكّي الحجر واذا جن بتنحِنيلو العاصفة وإذا تجلّى بتِخْضَر فينا جَنّات وإنك جملة لحنية متفوّقة عريقة رح تبقى درس بالآصالة لكل عاشق موسيقى اليوم وكل يوم ولتنتهي الأيام".
وتابعت: "أبومجد يا حبيب اللبناني وكل العرب يا ابن كفرشيما البار مهما بعّدتنا الأيام رح نرجع نلتقى هيدا إيماننا بالله، وحتى نلتقى لنغني للأبد أمجاد الرب بسألك بمحبّة طالعة من نص قلبي تِقبَل منّي بهاليوم الحزين كتير تقديري العظيم لفنك الأصيل لصوتك العالمي ولكل يلي كنتو بهالحياة".