بالفيديو| أمهات أمام معهد ناصر: "مش عايزين يدونا لبن.. وطردونا"

قطع عشرات المواطنين، صباح اليوم الخميس، طريق كورنيش شبرا أمام معهد ناصر، احتجاجًا على رفع أسعار لبن الأطفال المدعم، ورفض الشركة المصرية لتجارة الأدوية صرفه، ما تسبب في شلل مروري تام بكورنيش النيل.
وأكد أحد العاملين بالشركة المصرية لتجارة الأدوية أن المشكلة تكمن الآن في أن اللبن سيتم توزعيه من طرف وزارة الصحة في مراكز الأمومة والطفولة، وتابع: "لكن إحنا توزيعنا كشركة مصرية أفضل لأن كل الناس بتحصل على اللبن، لكنهم بيشتكوا من مراكز الأمومة دي إنهم مش بيطولوا أي لبن، وحصلت قبل كده، ودوه للمراكز وفشل الموضوع ورجعوه للشركة المصرية تاني"، وطالب بعودة اللبن في الشركة المصرية مرة أخرى.
وقالت إحدى الأمهات: "مش عايزين يدونا لبن، وطردونا من على الشبابيك، وقالوا الوزير رفع اللبن، واللبن في الصيدليات ب70 جنيه، المدعم ب17 وخلوه ب25 وقلنا ماشي بس أجيب ال70 جنية منين".
ووافقت على كلامها أم أخرى قائلة: "اللبن ب70 و80 جنيه، معايا عيل 6 شهور ومعنديش نقطة لبن في البيت أأكله إيه، أنا جاية من المنيب لحد هنا علشان اللبن، أجيب منين أنا بقى، أسيب الواد يموت؟".
وقالت جدة طفلة: "دي بنت أبني وأمها ماتت ومفيش حتة نجيبلها منها لبن خالص، وأبوها أرزقي وأنا جاية أجيبلها اللبن، جيت أجيبه من الصيدليات لقيته ب65 جنيه، مش ملاحقة أجيب لبن ولا أجيب إيه، وأبوها ساكن بالإيجار بيدفع 700 جنيه في الشهر".
وتسبب تجمهر الأهالي في شلل مروري تام على طريق الكورنيش، ومطلع كوبري المظلات، وتدخلت قوات الأمن وفضت التظاهرة، وأعادت فتح طريق الكورنيش مرة أخرى، ووجهت المواطنين للتجمهر بشارع شركات الأدوية، وعدم قطع الطريق.
وكانت وزارة الصحة المصرية قررت في مايو الماضي، خفض اللبن المدعم من 23 مليون علبة سنويًا إلى 18 مليون علبة بداية من يونيو الماضي، واعتمدت إجراءات جديدة في توزيعه، والتي لم تحل أزمة طوابير البحث عنه.
ويشار إلى أن حصة اللبن تبلغ 12 علبة شهريًا، وعادة ما يواجه الأهالي صعوبة في الحصول عليها كاملة، ويستهلك الطفل 3 علب على الأقل في الأسبوع.
من جهته قال الدكتور أحمد عماد، وزير الصحة إن القوات المسلحة اشترت 30 مليون علبة ووضعت عليهم لوجو القوات المسلحة ليتم بيعها بالصيدليات ب30 جنيها للعلبة بعد أن كانت تباع ب60 جنيها.