«أكان لا بد يا هانى أن تجيب لإلهام شاهين أسد وتعبان.. أديها اتخضت».. أخدت موضة برامج المقالب فى سكتها الفنان هانى رمزى، كان كويس قبلها والناس بتحبه، وبيمثل فى مسلسلات وأفلام وإعلانات وبترزق، لكن حمى الهئ والمئ وشفت فلان اتخض امبارح إزاى أصابته باضطراب جعله يخوض التجربة، إيه المشكلة ما كلهم بيعملوا برامج مقالب، جات عليه يعنى؟!
لا يعنينى إن كان برنامج المقالب مدبراً أم طبيعياً.. تم الاتفاق على كل تفاصيله بالكلمة والمشهد أو أن الضيف لا يعرف شيئاً عن الحدوتة، ما أهتم به أن يكون الموضوع على الشاشة غير مفتعل.. ربما تكون هذه أهم أزماتى مع برنامج «هانى فى الأدغال».. لاعتبارات تتعلق بأن هانى هو المادة الخام للافتعال، فضلاً عن أنه بينقى الحتة الأوفر اللى فى الإيفيه ويعلى عليها، فعلها من قبل فى برنامج المقالب العام الماضى.. وتعرض لهجوم وشتائم من اللى ما بتلزقش على صفحات التواصل الاجتماعى.. جعلته يكرر الموضوع عادى السنة دى، اعتباراً من أن ربما ما يقطع للجمهور شتيمة، عاد هانى ببرنامج تقوم فكرته على اصطحاب نجم إلى أدغال أفريقيا وهوب يطلع عليه أسد وحيوانات مفترسة.. يصوّت ويعمله نفسه اتخض ويفاجأ بأن العربية اللى قاعد فيها بها ثعبان، فيردد أعمل إيه يا ربى أسد بره وتعبان جوه -على آخر رمضان ستكون جملة أعمل إيه يا ربى هى الأكثر تداولاً فى رمضان- لا يمكن لأحد أن يقطع بمدى معرفة الضيوف بالمقلب، لكن اللى يشوف إلهام شاهين وطريقتها هيعرف الموضوع عامل إزاى.. تمثيل واضح وأداء لدرجة إن إلهام كانت بتبص للكاميرا بتاعتها أكتر من الأسد اللى داخل عليها.. حتى الإيفيه الشهير فى مسرحية «شاهد ما شافش حاجة» لعادل إمام، اتنحت فى الحلقة ورددته إلهام وهى شبه مندمجة ونصف مغمى عليها من آثار التمثيل «أنا بخاف من الكلب يطلع لى أسد يا هانى».. واللى طالع على هانى «أنا آسف.. أنا آسف.. أنا آسف» وكأنه داس على ديل فستانها، مش طلّع عليها حيوانات مفترسة.
بس الشهادة لله رغم حالة الافتعال المبالغ فيها والتمثيل الواضح، كانت إلهام حريصة إنها تدى الشغل حقه، يعنى بمجرد ما حست إن فقرة الأسد خلصت، راحت على آخر العربية وفتحت العلبة اللى فيها التعبان علشان تتخض.. بس الصراحة كان الوقت خلاص فقررت تلطم دقيقتين وتسيب العربية وتنزل حتى لو قابلها أسد، ما فيه طيارة جاية تنقذها.. وده الفرق بين الفنان المخضرم والمؤدى المستجد. الخلاصة وبدون زعل، بعد مشاهدة «هانى فى الأدغال» يمكن القول إن الفنانة إلهام شاهين لم توفق فى دور «المخضوضة»، لكن هذا لا يقلل من قيمتها كممثلة ولا من موهبتها كفنانة عادى وبتحصل.. وتتعوض إن شاء الله مع «رامز».