ليه بتتفرج على السما؟، السؤال ده كنت باسمعه كتير.في البداية نتعرّف، أنا اسمي محمد حسام، مُبرمج، من صغري كان عندي شغف بالفلك، من وأنا عندي 5 سنين تحديدًا، أول ذكرى ليّا ليها علاقة بالفلك كانت حلقة من حلقات "العلم والإيمان"، مش فاكر منها كتير غير إني كنت شايف كور جميلة، وكوكب بحلقات حواليه "زحل" وكوكب كمان أخد كام صدمة لحد ما وقع على جنبه "أورانوس"، لينا كلام تاني عليه.
النقطة هنا ليه الكلام ده علق في دماغي؟. الإجابة هي الشغف، إنك تعرف الدنيا فيها إيه، فكرة إن الأرض مدوّرة وإننا عايشين عليها كانت مثيرة جدًا لطفل، أن تعلم كيف يعمل العالم لهو شيء شيق بحق.
ساعدني على كده سكني في مدينة نصر في أوائل التسعينات، الظلام والسكون، وعدم وجود شيء يعمل بعد ما إرسال التلفزيون يتقطع، اتعلمت أقف أتفرج على السماء، ووالدي الله يرحمه علمني الدرس الأول، إزاي أفرّق بين كوكب "زي الأرض"، وأجسام عملاقة بتلف حوالين الشمس وبتعكس نورها، والنجوم، الأجسام المضيئة بذاتها، كنّا بنفرق بينهم بعينينا بكام نقطة لطيفة ناخد بالنا منها :
طيب.. الموضوع ببساطة إنك قدامك جسم لامع وثابت وحط تحت ثابت دي 100 خط، وعايز تعرف هو كوكب ولا لأ، نسأل 3 أسئلة لنفسنا:
1- هل هو بيتلألأ ويغيّر بريقه؟
لو الجو صافي ورطوبة معقولة/قليلة، الكواكب نورها ثابت ومبيتلألأش، لو الجو مش صافى تجاهل النقطة دي، ممكن يكون خداع بسبب الشوائب أو الرطوبة في الهواء.
2- هل فيه حاجة بتلمع أكتر منهم في السماء؟
المفروض كل الكواكب اللي نعرف نشوفها بالعين المجردة "عطارد، والزهرة، والمريخ، والمشترى، وزحل".. باستثناء "زحل" مافيش نجوم بتلمع أكتر منهم، لو حصل وشفت نجم تاني بيلمع أكتر من الجسم اللي أنت باصص عليه، بنسبة كبيرة أنت مش شايف كوكب، أو تكون في وقت ظاهر فيه عدة كواكب في السماء.
3- لونه إيه؟
لو حاجة لونها أزرق مستحيل تكون كوكب، لأن ده لون "أورانوس" و"نبتون" ولا نستطيع رؤيتهما بالعين المجردة.
الكواكب ألوانها كالتالي: "آه النجوم والكواكب ليها ألوان بس العين اللي مش متعودة تتفرج عليهم مش هتميزها، لو بصّيت لكذا نجمة مش هتلاقيهم لون واحد وهتحس الفرق".
الزهرة و عطارد: أبيض لامع جدًا، ودايمًا بنشوفهم على قرب الشروق أو الغروب، مش في أنصاص الليالي.المريخ: مائل للبرتقالي، أو الأحمر.المشترى: أبيض يميل للأصفر قليلًا، وتاني أكثر كوكب لامع بعد الزهرة.زحل: أبيض مائل للذهبي أو الأصفر.
طيب، لو جينا لنقطة أن اللي إحنا مش شايفينه مش ثابت، بيتحرك في السماء، السؤال هنا، هل فيه نور أزرق وأحمر بيومضوا فيه؟ لو آه حضرتك شايف طيارة بعيدة أكيد، لو لأ أنت شايف حاجة من اتنين، يا قمر صناعي "عادة بيبقى من أقمار إيريديوم"، مجموعة من أقمار الاتصالات اللي بتطير على ارتفاع 500 كم تقريبًا من سطح الأرض، أو محطة الفضاء الدولية، الاتنين دول بيظهروا بوضوح شديد حتى لو جوة المدينة، بيظهروا و بيمشوا شوية في السماء ويخفتوا، ويظهروا تاني، زمان كان ممكن تشوف محطة مير كمان "كانت محطة روسية تم إسقاطها 2002 لأعطالها المتكررة"، المهم أنت كنت بتعتبر محظوظ جدًا لو شفتهم زمان.
دلوقتي الموضوع مبقاش صعب خالص، أنت عندك نتايج وبرامج بتجيب مواعيد مرورهم لمكانك بدقة وعندنا خرايط تفاعلية للسماء متخلكش حتى تفكر تحفظ أسامي النجوم وأماكنها، خلينا نجيب أشهرهم هنا :Google Sky Map التطبيق ده أندرويد ومجاني، خفيف جدًا ومفيد، بس يعيبه قلة التفاصيل اللي بيقولهالك عن اللي أنت شايفه.Star Chart
فيه منه نسخة مجانية مفيدة ونسخة بفلوس، النسخة المجانية مفيدة جدَا، اللي بفلوس فيها مواعيد مرور الأقمار الصناعية والمحطة الدولية، كمان موجود آي فون- آي باد وأندرويد.
Sky Guide من أحسن البرامج اللي استخدمتها، مشكلته أنه مش مجاني وكان لآي فون - آي باد بس
Star Walkبرنامج لطيف بس لأغراض تعليمية أكتر منه خريطة تفاعلية للنجوم.ربما كان الموضوع صعب جدًا من عشر سنين، أنك تعرف تجيب شكل السماء النهاردة، بس الموضوع مبقاش صعب خالص وتقدر تعمله بأي سمارت فون دلوقتي، مرفق هنا لينك فيها إزاي نعرف نستخدم Star walk و Star Charts.