صوت الوطن

الدم ده مش لب قزقزته
أو كان عجين ع الجمر وخبزته
لحد إمتى حتقلب الآية
تقتل قتيلنا وتمشى فى جنازته
.. .. ..
مصر اللى صادقة القلب والنية
ضحكتها نيل وبكاها حنية
الخير مراكبى من الشقى فجره
والأهرامات غنوة فواعلية
لا مصر عزبة يابنى ولا شروة
علشان تبيعها وتسرق الثورة
إعلف وربِّى جايلك أضحى
واللى حيفضل م الخروف فروة
============
حضر الوطن بس الرئيس فينه
فيه ألف خطبة وخطبة فايتينه
أهله وعشيرته قالوا دى مؤامرة
طبعاً أكيد هما اللى خاطفينه
===============
مصر ف عيونى ومش حتسرقها
صادقة وقريبة للى صدقها
ومفيش لا لون ولا دين يميزنا
وحّدها مينا ومين يفرّقها
حرية طبعاً واشهدوا يا ولاد
ياللى اتصلبتوا ف الاتحادية
وعدالة هى القاضى والجلاد
قاتل طليق وشهيد بلا دية
لو غطسوك يا ولدى فى مراجل
صون كلمتك وإياك من التهييس
د اللى بيمسك كلمته راجل
واللى بيرجع فيها يبقى رئيس