نداء «هيام» على الخضار: مالوش دعوة ب«الدولار»

الحديث عن «زيادة الدولار» لا يشغلها كثيراً، تقف «هيام» أمام فرشة الخضار بسوق البساتين، تنادى على زبائنها بأسعار الخضراوات التى تبيعها بنفس ثمنها، رغم ارتفاع سعر الدولار الأخير الذى وصل ل9 جنيهات، ودفع التجار والبائعين كعادتهم لاستغلال الأزمة، إلا أن خضار السيدة الأربعينية حرصت على أن تبيعه دون زيادة أو نقصان.
ترى أن أزمة الدولار نتاج جشع التجار
فى السادسة صباحاً، وقفت هيام محمد كعادتها بين خضارها، يتعجب المارة من الأسعار التى ترددها من حين لآخر، وسط غيرها ممن استغلوا الأزمة فى رفع أسعار سلعهم: «زباينى عارفين أسعارى إنها مش بتزيد، لكن الناس اللى ما تعرفنيش بيسألونى الأسعار اللى بقولها حقيقية ولا بجيب رِجل الزبون بيها»، لم تجد «هيام» مبرراً واحداً للتجار والبائعين لزيادة أسعار سلعهم مع زيادة الدولار، ترى أن جشع التجار سبب رئيسى فى الأزمة: «ما بيفكروش إلا فى مصالحهم، والسلع تبقى عندهم من قبل الزيادة ويبعوها مع الأزمة بزيادة، عشان كده هما مسئولين عن الأزمة بسبب جشعهم».
حالة من الفرحة والسعادة انتابت «هيام» بمجرد سماعها عن أزمة الدولار الأخيرة، لأنها زادت أعداد زبائنها لرخص أسعار خضراواتها: «الناس كانوا بيستسهلوا ويشتروا من السوبر ماركت اللى بتعمل عروض على الخضار، لكن بعد زيادة الأسعار ناس كتير بقت تجيلى مخصوص بعد ما نزلوا السوق وعرفونى»، الشىء الوحيد الذى يشغل بال «هيام» وزوجها، الذى يشاركها الفرشة، مع ارتفاع الدولار، هى مصاريف الأبناء واحتياجاتهم: «إحنا ما بنزودش على حد، لكن اللى بنشترى منهم بيزودوا علينا، ومصاريف العيال كتير بس ده مش مبرر إننا نزود فى الخضار اللى بنبيعه زى غيرنا»، مضيفة: «بقالى 6 سنين على الفرشة، ينزل يطلع الدولار وخضارى زى ما هو، صابح وسعره على قد الإيد».