حملة مش دافعين ضد غلاء فواتير الغاز والكهرباء والمياه والتليفونات بكفر الدوار

أطلق المئات من شباب الثورة بمركز كفر الدوار، بمحافظة البحيرة حملة بعنوان ( مش دافعين) وقد قام الشباب بكتابة منشور جاء فيه.
«احنا مجموعه من شعب مصر.. من شباب كفر الدوار.. اتكوينا من نار الأسعار اللي خلصت على مرتباتنا.. واتبهدلنا في المواصلات... وواقفين طوابير قدام الافران وانابيب البوتجاز.. وواقفين في طوابير البطالة، وكل ده وكمان جايين يغلوا الكهربا والغاز وحتي المياه اللي بنشربها ؟؟... واللي زاد وغطا بقي يا اخوانا... الانفلات الأمني اللي في البلد... العربيات بتتسرق عيني عينك...واحنا بنتثبت في الشوارع عيني عينك...والمخدرات بتتباع علنا ..والبلد داخله علي خراب ألعن من الاول .طيب احنا عايزين ايه ؟؟.
ببساطه احنا عايزين العدل... عايزين حقنا في ثروات بلادنا.. وعايزين نعرف المياه تمنها بيزيد ليه ؟؟ اذا كانت المياه بتيجي من النيل والنيل زي ما هوه... والكهربا بتيجي من السد العالي... والسد زي ما هوه وما اتغيرش... والغاز بيطلع من ارضنا... ومفيش حاجه اتغيرت.. تبقي الفواتير بتزيد ليه ؟؟ طيب المطلوب بقي منكم انتم كمواطنين ايه ؟؟ سهله خالص، الامتناع الجماعي عن دفع فواتير الغاز والكهرباء والمياه والتليفونات وركوب المواصلات العامة مجانا والامتناع الطوعي عن العمل.
إذا لم تنجح الطرق دي في دفع نظام المرشد والاخوان لإلغاء ارتفاع اسعار الغاز والمياه والكهرباء.. يبقي الحل الاخير قدامنا ولابديل عنه هو العصيان المدني الشامل.
ده رأينا أيه رأيكم ؟؟ علي فكره.. احنا كلنا هنقف مع بعض وهنمنع أي حد ييجي يشيل العداد من عند أي واحد فينا، حملتنا هي خطوة لتحقيق العدالة الاجتماعية واسقاط الظلم والقهر والاستبداد هذا وقد لاقت الحملة استحسان كبير من جانب الأهالي وقرروا الانضمام للحملة ورفض عدد كبير منهم سداد الفواتير الشهرية .