سائق «التوك توك» قاتل زميله: «خَد دورى»

بنظرات حائرة وجسد هزيل، وقف «أحمد باهى»، 20 عامًا، سائق «توك توك» يدلى باعترافاته أمام المستشار أحمد عامر، مدير نيابة حوادث شمال الجيزة فى جريمة قتله «ل. صابر.م»، 18 سنة، سائق «توك توك»، بعد نشوب مشادة كلامية بينهما بسبب الخلاف على أولوية تحميل الركاب.
وقال فى اعترافاته أمام النيابة: «مكنش قصدى أقتله، الأمور جت كده من غير حساب، كل يوم بتحصل ألف خناقة بين سواقين التكاتك بسبب الدور فى تحميل الركاب، وفى خناقات بتخلص بدرى وخناقات تانية بتكبر وبتوصل لأننا ممكن نضرب بعض بالسلاح الأبيض». وأضاف: «كل واحد فينا فى الموقف بيبقى شايل مطواة أو حتة حديدة عشان يدافع بها عن التوك توك أو عن نفسه لو حد حاول يتراذل عليه».
وتابع المتهم: «كلنا غلابة وبنشتغل على التكاتك عشان فلوسها حلوة، وكل يوم بنتعرض لمشاكل بسبب بتوع الكارتة اللى بياخدوا منا فرِده عشان يخلونا نشتغل على الخط، وأنا اشتغلت على التوك توك رغم أنى معايا دبلوم بس ملقتش شغل بيه، وبدل ما اقعد على القهاوى، وعشان أعرف أصرف على نفسى وماتحوجش لحد، وعشان أعرف أجهز نفسى وأتزوج البنت اللى بحبها».
وأشار إلى أنه كان يتبقى 3 شهور فقط على ميعاد زواجه، وأنه يجهز حاليًا فى شقته، وقال: «كنت خلاص هدخل دنيا.. إيه اللى يخلينى أقتل واحد وأضيع نفسى؟»
وعن تفاصيل الحادث أضاف: «يوم الحادثة كنت واقف بالتوك توك اللى شغال عليه فى الموقف، وكان الدور عليا فى التحميل، وبعدين راح جه هو قدامى وقفل عليا بالتوك توك بتاعه وبدأ يحمل هو.. روحت له وقلت له أن ده دورى أنا وأننا فى ساعة صبحية ومش عايزين نضايق بعض، فشتمنى بأمى، وضربنى على وشى بيده، وراح ينادى على صحابه فى الموقف، وفعلًا جم ضربونى واتكاتروا علىَّ وأنا وحدى لغاية ما جه هو وراح ضربنى بالمطواة فى كتفى».
واستكمل: «جريت على التوك توك وجبت منه الحديدة اللى شايلها فيه ورحت ضاربه بيها وأصحابه عشان أبعدهم عنى لغاية ما وقع على الأرض.. لم أشعر بنفسى بعدها إلا وأنا باخد من إيده المطواة اللى ضربنى بيها وبضربه بيها أكتر من طعنة، لحد ما لقيت الدم مغرق الأرض، روحت سايبه وجريت خوفًا من انتقام أصدقائه».