ضحك للركب قواعد استخدام الكاميرا الأربعون

طالما التكنولوبيا خلت كل واحد فى الدنيا فى إيده كاميرا والتصوير بقى هبل فى الجبل بص يا بابا بصى يا حبيبتى
1- من حقك تعملى بوز البطة وتتصورى براااااااااااااااااااحتك دى حرية سخصية بس متعمليش لحد تاج الناس ملهاش ذنب تتفزع
2- ماينفعش تصور حد من غير ما ياخد باله ده مش هزار دى قلة أدب
3- مهما كان المنظر اللى إنت شايفه فى الشارع غريب مينفعش تصور من غير ما تفهم هتقولى واحد بيبوس واحدة هقولك وأنت إيش عرفك هو صفته إيه بالنسبة لها وإيش عرفك بيبوسها ليه يا تنهى عن المنكر بأدب يا تخليك فى حالك وفى كل الأحوال مش من حقك تصور حد غصب عنه لمجرد إن معاك زفت.
4- ماينفعش واحدة لبسها مش عاجبك فى الشارع تصور وترفع بوست وتعيش دور الواعظ الفاهم فى الموضة واللبس.
5- متعملش فيها مصور صحفى وتشوف مصيبة بدل ما تساعد تقعد تصور
6- لما يقابلك متسول وتعمل خير متصورهوش إلا لو الصورة دى هتساعده يرجع بيته غير كده يبقى انت تبييييييييييييييييييييييييييييييييييييييييييت.
7- عيب حد يكلمك خاص وتاخد اسكرين شوت إلا لو بعلمه عشان هو وثق فيك وقالك حاجة ميقدرش يقولها فى العلن.
8- عيب يبقى ليك صديق وتختلفو تروح مهدده بالإسكرين شوت، ده إن دل على شئ هيدل على وطينتك انت بس.
9- لو ركزت فى حياتك ربع ما بتركز مع الكاميرا احتمال تبقى حاجة
10- الصورة اللى انت شايفها غريبة ونادرة غيرك ممكن متفرقش معاه متفرضش زوقك على حد.
11- الناس الرخمة اللى بتشتغل فى مواقع أخبار وتكتب جنب الخبر شاهد قبل الحذف انتو هتتكهربو وتغرقو وتولعو ولا حد هيحس بيكم.
12- حرية اختيارك للصور آخرها صفحتك الشخصية متحتلش بقى صفحات وجروبات وحنفيات الناس.
13- هواة الكوميك فكر قبل ما تبدع وتستخف دمك، الصورة دى ممكن تجرح مين وتزعل كام حد.
14- هواة الشير عيب قووووى تعمل شير لصورة شخصية حاططها واحد أو واحدة على صفحته وتحط عليها تعليق يعبر عن خفة دمك.
-
الرحمة فوق العدل والإنسانية فوق الكاميرا يعنى ميبقاش فى تريقة وناس بيوتها بتتخرب وانت بدل ما تساعد ولا حتى توسع طريق تقف تصور
اللى عنده دم_ أحسن من اللى عنده «كام».
40- التكنولوجيا نعمة ربنا يسرها لك متخليهاش تبقى نقمة