ليبيا مش مصر

يعنى إيه أصحى من النوم ألاقى الناس بتقول فيه ثورة فى ليبيا وانقلاب على الشرعية.. والفيس بوك وتويتر ماليانين عبارات من نوع «ليبيا على خطى مصر».. «ليبيا تقلد مصر وتثور على نظام الإخوان»؟! يا جماعة اللى بتقولوه ده ما يصحش.. «ليبيا مش مصر».. عارفة إنها جملة سُمعتها وحشة، بس هى دى الحقيقة.
الأخ اللى بيقول: كلها انكلابات على الشرعية.. سامعاك وشايفاك.. مش تعقل بقى؟
الإخوة اللى بيهللوا وفرحانين وبيقولوا كده السلاح اللى بيدخل مصر هيقف.. والنبى تريّحوا خمسة.
تعالوا بقى أحكيلكم ليه «ليبيا مش مصر».
فى 30 يونيو الشعب المصرى كله فى كل حتة فيكى يا مصر قام وعمل ثورة.. مش محافظة لوحدها ولا قبيلة لوحدها رغم وجود قبائل فى مصر، لكن الأساس عندهم صفة المواطن المصرى مش العصبية القبلية حتى لو كانت موجودة فى أوقات تانية.. تعالوا بقى نبص على ليبيا، الوضع مختلف، الموضوع واخد شكل قبلى أكتر منه شعبى، وده من ساعة ما بدأت الثورة فى ليبيا، الصراع هناك بين القبائل مش ثورة على نظام حاكم وخلاص.
لما نزلنا فى 30 يونيو كان بيحمينا ويساندنا كل مؤسسات الدولة.. «العميقة والغميقة على رأى البعض». بص بقى على ليبيا، هىّ فين أصلاً مؤسسات الدولة اللى هتساند وتحمى ثورة شعبية «ده لو فيه ثورة شعبية أصلاً».
طيب نفترض إن فى 30 يونيو كان حصل قتال وضرب بين الشعب والمحظورين أكبر من اللى حصل، يا ترى كان هيحصل عندنا حرب أهلية؟
أنا بقى الصراحة الكلمة دى مش بتنزل لى من زور، إحنا ماينفعش يحصل عندنا حرب أهلية بوضعنا ده.. آه يا اخويا ماينفعش.. ماتنفشّ ريشك وتقول لى إنتى إيش فهمك؟
ببساطة علشان يحصل عندنا حرب أهلية لازم يكون عندنا جيش ضعيف أو جيش تكوينه وتركيبته الأساسية طائفية أو عنصرية أو قبلية.. هتقول لى: ليه؟.. هاقولك: علشان تبقى الانشقاقات فيه سهلة ونسبة حدوثها عالية.. ولو حصل انشقاق فى الجيش هتعلى فرص الحرب الأهلية.
فى حالتنا إحنا الجيش وطنى صرف وقوى، هيقف حكم بين الناس ويسيطر على الوضع ويمنع الاقتتال.. فإن تحصل حرب أهليه عندنا دى مستبعدة بدرجة كبيرة.
فرّجنى بقى كده على الوضع فى ليبيا.. فين الجيش حضرتك.. بتدوّر على إيه؟؟؟
مافيش جيش فى ميليشيات بيحاولوا يسيطروا عليها ويعملوا منها جيش نظامى.
كلمنى بقى عن الوضع لما يطلع شوية شعب دلوقتى يقولك نرفض النظام الحالى «اللى هوّ بالمناسبة مش موجود أشاساً».. كل اللى هيحصل إن الحبة التانيين من الشعب هيقولولهم: لا يا حلوين إحنا مع الشرعية.. وبما إن ما شاء الله السلاح بكل أنواعه تقيل وخفيف وتخين موجود مع كل الشعب الليبى.. هيقوموا يدبوا فى بعض وهوب الجيش يقوم يدب معاهم وتدخل ليبيا فى حرب أهلية بجد.
طب آخرة الحرب دى إيه؟؟ يا هتستمر كام سنة حلوين وهتنتهى بالتقسيم، يا هتتقسم بدرى بدرى.. فى الحالتين التقسيم جاى جاى ومعروف: «البرقة، طرابلس، وفازان» ما هى كانت كده قبل الاستقلال من الاحتلال الإنجليزى.
فالحقيقة مش فاهمة اللى فرحانين بالثورة فى ليبيا فرحانين بإيه بالصلاة ع النبى كده.
دى مصيبة.. نعرف منين إن الحوار ده مش معمول علشان يتم افتعال صراع مسلح على حدودنا لاستنزاف الجيش فى صراع جانبى يخفف الضغط على الإرهابيين فى سينا.. فرحانين بإيه بالذمة؟
ليبيا مش مصر، وده للأسف والأسى والحزن.. يا ريت كان عندهم جيش فى وطنية جيشنا، كان الوضع يختلف.. ما كانتش ضاعت ليبيا.. لكن الوضع مختلف. أبسط شىء وزير الداخلية محسوب على تنظيم القاعدة.. أسمع زغروطة بقى.
بالمناسبة كلمتين للأخت توكل كرمان السعيدة بفيدرالية اليمن: سيدتى العزيزة، واضح إن معلوماتك السياسية زيرو «نوبل؟؟؟».. حضرتك وُجدت الفيدرالية لتجميع المقسم وليس لتقسيم المجمع.. بتباركى للشعب اليمنى على إيه؟ بجد بجد والنبى فهمينا! وأمريكا إيه اللى بتشبّهى اليمن بيها.. أمريكا كانت ولايات اتجمعت واتحدت، ده حتى اسمها الولايات المتحدة.. انتوا كنتوا دولة موحدة وقسمتوها.. واى، واى، واى؟ حاجة أخيرة: بطلوا أفورة وكلام عن المؤامرة يا أوفر يا وحشين.. حتى بالأمارة بصوا حوليكم كده.. سوريا هادية وزى الفل.. اليمن ما شاء الله كبرت وبقت يمنات مش يمن واحدة.. ليبيا بتحاول تحصّل اليمن.. العراق بقى مش حاقولك على الاستقرار اللى فيها.. تونس زهقانين من جمال الأوضاع عندهم.. وانت تقولى مؤامرة؟.. يا أخى اختشى، خلى عندك دم.