للملحدين وجوه أخرى

لما تقرى بوست بتاع واحد تعبان فى دماغه بيتطاول فيه على ربنا وعلى الأديان بتقول فى نفسك ده ملحد ربنا يهديه، الحقيقة هو ملحد فعلا بس ياترى من اى نوع؟ متستغربش ماهو الملحدين انواع:
الملحد المثقف: وده بقى قارى ومطلع وفضل يقرأ ويقارن فى الأديان كلها عشان يعرف يناقش وهيناقشك مناقشات طويلة عريضة يكشفلك فيها جهلك بالدين، وبعدين يستغل ده عشان يحط عليك وعلى دينك اى كان وهو مبينقيش غير حد هو متاكد انه اجهل منه عشان يتنطط عليه بشوية الثقافة اللى عنده.
الملحد بتاع الجمهور عاوز كده: وده بقى بيبقى ليه شوية معاتيه ماشيين وراه، ولما يبتدوا ينفضوله يقوم عامل حركة الإلحاد دى عشان يفهم تابعيه انه مختلف اخر حاجة وعنده اخر صيحة فى الإلحاد.
ملحد خدونى معاكو والنبي: ده بيبقى شخص مالوش اى تلاتين لازمة وفجاة اتصاحب على شلة عسلات كده ودمهم شربات وموهوبين فى الإلحاد، هو بيمشى وراهم مش حبا فى الإلحاد بس هو عاوز يفضل مع الشلة الجميلة دى وخايف يعارضهم احسن ينطروه
ملحد على ما تفرج:ده بيبقى حد فاضى ومش لاقى حاجة يعملها فبيقعد يتأمل فى الوجود الإنشكاحى الزرومبيحى فيلاقى نفسه مش مقتنع ان راسه تبقى فوق ورجليه تحت ويحط تساؤلات عميقة من نوعية هى الفرخة ولا البيضة ولا ديك ام الفرخة
ملحد عشان مكسل: مكسل يصلى مكسل يستغفر
ملحد بتاع شوفتنى وانا ملحد: وده بقى ليل نهار بوستات كأنه بيقول للناس تعالوا شوفونى بقى طب سليفى كده وانا ملحد
الإلحاد ادب يا قلالات الأدب جاتكم الهم