للأمهات الجدد.. تعرفن على القواعد الأربعين "لخلع الحفاض"

يُعتبر خلع الحفاض للأطفال قرار صعب للغاية ومن أهم التحديات بالنسبة للكثير من الأمهات، وخاصةً الأمهات الجدد.
وفي هذا الإطار، تواصل "المستقبل" مع دكتور الشربيني محمد الشربيني، أخصائي طب الأطفال وحديثي الولادة، لمعرفة الإرشادات التي تسهل على الأمهات خلع الحفاض لأطفالهن، نسعرضها لكم على النحو التالي:
– اصبري كثيرًا.
– طولي بالك.
– مالكيش دعوة بحد.
– انتي تقدري.
– بالهداوة مش بالقساوة.
– العنف بيجيب نتيجة عكسية.
– ابدأي لما الجو يحرر، زي الأيام دي.
– شيلي السجاجيد و اقفلي المكاتب و الدواليب، ارفعي عفش شقتك 10 سم عن سطح الأرض.
– اصبري كتير.
– ما تبدأيش قبل سنتين.
– ارجعي لقاعدة رقم 3.. مالكيش دعوة بحد.
– فرغي نفسك أسبوعين و اوهبي وقتك للمهمة العظيمة دي.
– اخلعي الحفاض طوال اليوم يلبسه وقت الخروج أو النوم.
– كل ساعة لساعتين قعديه في التواليت من خمس لعشر دقائق.
– كلميه كتير في الموضوع ده حتى لو كلامه قليل أو مش بيتكلم، هيفهم.
– شجعيه كل ما يقعد في التواليت حتى لو ما حققش الهدف، صقفي له و غني له.
– هو لسة بيتعلم، طبيعي يبقى فيه خسائر مثل اتساخ الملابس وأرض البيت.
– افتكري.. العنف هيأخرك.
– استخدمي طريقة المحاكاة أو التمثيل؛ خلي لعبته المفضلة يقعد في التواليت و شجعيه هيتأثر.
– هيفضل كام مرة يغلط في التقدير و يعمل عملته بعد ما يقوم من التواليت بدقائق.
– لما يحقق التارجت و يعمل المراد قي التواليت احتفلي معه و حسسيه بالإنجاز.
– طولي بالك.
– كتري عدد المشجعين: باباه و إخواته و المجتمع و الناس.
– لو بيخاف من الحمام حببيه فيه، هاتيله سلم أو قاعدة صغيرة و ستيكرات ملونة تكسر رهبته.
– مالكيش دعوة بحد.
– خلع الحفاض في سن أقل من سنتين صعب و لا يوجد منه فائدة.
– أكتر من 3.5 سنوات هيتعبك و يعاندك.
– لو نجحتي في خلع الحفاض بالنهار حليتي 90٪ من المشكلة.
– متصدقيش حد يقولك الطفل بيتعود على خلع الحفاض عند 7 شهور، كله كلام هدفه تعقيدك.
– لو بيعمل و هو نايم ده مش بإيده حتى اسمه تبول لا إرادي.. إياكي تعاقبيه.
– العنف هيأخر.
– لحد خمس سنين مقبول يبل سريره بالليل بعد كده اكشفي.
– قللي شربه للسوائل قبل النوم، و ما تنيميهوش زعلان.
– عوديه يدخل الحمام مباشرة قبل ما ينام.
– اصبري كتير.
– مع الوقت علميه الخصوصية في خلع ملابسه و دخول الحمام، وعلميه النضافة بعد الحمام.
– اتعبي شويه هترتاحي كتير.
– همسة في أذن الأب؛ لو سمحت اوعى تزعلها في المرحلة دي و تقبل كل شيء منها و إلا قوم انت بالمهمة دي.
– اصبري و طولي بالك و احتسبي الأجر و الثواب عند الله.
– احتفلي مع طفلك بكل إنجاز يعمله حتى لو كان مجرد إنه تعود على خلع الحفاض وبقى بيقضي حاجته في التواليت، لأن ثقته في نفسه و إحساسه بأهمية أي حاجة بيعملها بتتنقل له منك انتي.