بعد قرار عودة المجلس .. عمرو مصطفى يدعوا لثورة ضد الأخوان

فى أول تصريح له بعد قرار رئيس الجمهورية "محمد مرسى" بعودة مجلس الشعب على الرغم من قرار المحكمة الدستورية العليا ببطلانه, انتفض الفنان عمرو مصطفى مهاجما الرئيس مرسى بعد هذا القرار الجمهورى الذى صدر أمس وقام بدعوة جمهوره عبر صفحته الشخصية بموقع التواصل الاجتماعى "فيس بوك" بالنزول للإعتصام أمام المنصة للوقوف أمام هذا القرار وقال لهم "انزلوا بسرعة علي المنصة .. حرام عليكوا البلد بتضيع".
وأضاف .. " الموضوع باختصار ... مرسي مدعوم من أمريكا وهي اللي بتحرك الجماعة انهم يعملوا قرار زي ده (اعادة مجلس الشعب) علشان الجيش يتسرع ويعمل انقلاب على مرسي ... تقوم أمريكا تدخل لحماية مرسي وتقوم بضرب الجيش .. والجيش ذكي وواعي للخطة القذرة بتاعت أمريكا والاخوان , والجيش بيطلب بطريقة غير مباشرة من الشعب ان الشعب يحتج وينزل ويعمل ثورة ... علشان الجيش يتدخل على أساس أنه بيحمي الشعب .. بالعربي كده الجيش مزنوق في خانة اليك والشعب هو اللي لازم يتحرك ويثور على مرسي وعلى الاخوان .. بس اللى مفروض يتحرك الاول وبسرعة هو الشعب .. يالا ننزل هي دي فرصتنا ان احنا نرجع بلدنا من يد الأخوان .. بلاش سلبية ابوس ايديكم".
يذكر أن الفنان عمرو مصطفى هو من أقوى المعارضين لسياسة الرئيس محمد مرسى بشكل خاص و لجماعة الأخوان المسلمين بشكل عام حيث كان من أشد المؤيدين للفريق أحمد شفيق فى الجولتين الاولى والثانية من الإنتخابات الرئاسية التى أسفرت عن فوز مرشح حزب الحرية والعدالة و الاخوان المسلمين الدكتور محمد مرسى.