نشرت الفنانة " إسعاد يونس " مقال على صفحتها الشخصية بموقع التواصل الاجتماعى "فيس بوك" تعقب به على الاحداث الجارية بمصر قائلة: "موضوع الساعة.. جماعة الأمر بالمعروف و النهي عن المنكر.. شوية عيال مقاطيع لامّاهم عصابات من رُكاب الرايجة.. ومادام الرايجة اليومين دول الجلابية القصيرة و المركوب و التلفيحة السعودي و الدقن اللى بتدفي الصدر لزوم إثبات الهوية الخلافية و الانتماء إلي الأسرة الحاكمة و الفصيل الراكب علي ضهور العالم و ارهاب خلق الله.. يبقي شغال يا معلمي بدل اللطعة في السايبر و الدخول عالشبكة الإليكترونية و الشرشحة بإسم الدين و استعراض فنون القمامة اللفظية و سب الدين بالمرة و اتهام الناس أى تهم زى الليبرالية و التكفير و الفلول و أى بقين حفظناهم.. ننزل الشارع و نتهجم عالعالم.. و ان ماكانتش سبوبة أهه تبقي نشوة ممارسة السلطة التي ستتحول قطعا بعد شوية لنمط جديد من البلطجة و تلقيح الجتت عالتجار و اصحاب المحلات و نستقضي المصالح ببلاش مقابل الإتاوة للحماية.. وانا سعيدة بهذه الظاهرة.. خليها تقب ع السطح بقي لأن الشعب الطبيعي اللي بيتخنق بسرعة.. وبعد الكام حادث اللى حصلوا.. سوف يمضغهم و يبتلعهم و يهضمهم و يتخلص منهم في شكل نفايات تتسرب عالصرف الصحي و يمكن يستعملوهم سباخ آدمي فيصبح لهم منفعة برضه.. فقط أتمني أن يحدث ذلك بدون دم.. استكفينا دم.. وذلك لأن الدنيا أصبحت سداح مداح ولا فيه قانون و لا فيه حد ينفذه ولا بطيخ.. زاد و غطي السادة الأفاضل مغتصبي المنابر أمثال السيد أبو اسماعيل الذى تعاد نشر رائعته التليفزيونية عن أصول الخروج في مجموعات او تشكيلات من هذه الجماعة لتهذيب الناس فى الشوارع و إعادتهم إلي الخُلق القويم.. انتوا تمشوا مع بعضيكم سبعة تمانية.. يتقدم واحد منكم برقة كده للمواطن و يسأله " المزة اللى معاك دى يا كابتشن مراتك؟؟.. بنتش خالتشك؟؟.. سديكة مثلا؟؟ لأ لأ .. عيب كده يا ولد.. معاك بطشاقة؟؟.. إثبتلي إنها أختشك.. إثبتلي إن دي إن إيهك مطابق لدي إن إيهها.." ما أثبتش و بوّق فيك.. بخرزانة رفنتوعة كده و لسوعه عالبوبو.. أتهجم عليك تقوم مصفّر للسبعة تمانية اللى معاك و تقول ف عقل بالك " جزر ".. يهجموا عليك ليس بقصد الارهاب لا سمح الله و لا الكلام اللى الكلاب المغرضين بيقولوه علينا.. بسماحة مغلفة بفتونة كده و معلمة عشان يخلصوا الحوار.. دب دب.. تكوموا الواد عالأرض.. فلفص ف إيدكوا.. خلصوا بقي.. مش عاوزين خوتة وشهود و قرف.. خللي الناس تتربي.. ده علي افتراض ان انتوا متربيين أساسا.. لا فض فوك يا سيد ابو اسماعيل.. أصفق لك على بطاطي زى القرود مهللة شاكرة معجبة.. ده إيه الحلاوة دى يا باشا؟؟.. انتوا تطلعوا كلكوا علي بعض كده بسلطاتكوا ببابا غنوجكوا تسعة عشرة مليون.. احنا تمانين يا باشا.. ده ف عز عز الفوضي و الانفلات الأمني المصطنع اللي اتمثل علينا ده.. الله أعلم من مين فيكوا بقي.. عملنا اللجان الشعبية و حمينا نفسنا و بيوتنا و عيالنا.. حاتيجوا إنتوا.. و متعلمين بالزي و الدقون كده و تسلكوا فينا؟؟؟.. هارسوح.. ما عشنا ولا كنا.. داحنا قاومنا الحملة الانجليزية بالمية المغلية و الزيت المقدوح يا با.. والا ما قريتوش تاريخ؟؟.. رغم انتهاء القصة و لكني لازلت افطس م الضحك كلما تذكرتها.. قالك شفيق هرب من مصر و معاه 7110 كيلو عالطيارة؟؟.. ليه راكب تاتانيك؟؟.. شاحن سبع "فيلة في بطن الطيارة و واخد الزلاليم ف إيده هاندباج؟؟.. هو أى هتش و خلاص؟..مصر مين فيهم؟؟؟