بعد ظهوره في "ذا فويس".. حفيد فريد شوقي: النسب الفني مش لعبة.. وكريم الحو لا يحمل اسم أو صلة بمحمد فوزي

نفى الفنان محمد عبد الوهاب، حفيد الفنان فريد شوقي، صحة ما تردد عن ادعاءات الشاب كريم الحو، متسابق برنامج "ذا فويس"، بأنه حفيد الفنان الراحل محمد فوزي، وقال: "الموضوع بمنتهى البساطة، أولا الشاب كريم ده ربنا يا رب يوفقه ويكرمه ويحصل له كل ما يتمناه بس مش بالكدب ده رقم 1، رقم 2 بعيد عننا، احنا منعرفهوش ومش قريبنا، ومش أي حد عشان عيلة الحو يبقى خلاص قريب محمد فوزي.. أصل عيلة الحو دي كبيرة، أنا نفسي محمد فوزي يبقى خال أمي لزق على طول وأخو جدتي خبط لزق.. مبقولش إن أنا حفيده، بقول يا إما أخو جدتي يا إما خال أمي، وكل الكلام ده مهم إنه يتعرف".
تصريحات محمد عبد الوهاب

وأضاف محمد عبد الوهاب في تصريح خاص لموقع "الفجر الفني" أن أي محاولة لنسبه لشخصية فنية كبيرة مثل محمد فوزي أو أي فنان آخر غير صحيحة، موضحًا: "لو طلع غنى حاجة مش كويسة هيتقال أول حاجة المانشيت اللي هيتكتب حفيد محمد فوزي خلاص.. ثبتت لأ، هو مش حفيده، واحنا منعرفهوش.. ربنا يوفقه بعيد عن اسم محمد فوزي، وبعدين انت حفيد محمد فوزي طالع تغنيلي اه لو لعبت يا زهر؟ مش تقليلا من الأستاذ أحمد شيبه على راسي من فوق.. أنا بعشق الشعبي طبعًا، لكن ده لون وده لون، انت بتقارن بمحمد فوزي ده تراث يا ابني، ده عنده أغاني كتير عظيمة".
وعلق محمد عبد الوهاب على التعليقات التي قالت إنه اعترف بذلك خجلًا من إحراج أحمد سعد: "احنا منعرفش عنه حاجة خالص، دي أول مرة نكتشف كده إن فيه ناس ممكن تنسب لنفسها بالكدب.. أولا مافيش حاجة اسمها اتحرج وأجيب لنفسي مصيبة، هو في الأول خالص شاور برقبته كذا مرة إنه موافق، ولما لقى إن التاني هيزود قاله عشان يبقى بالظبط ابن عم جدي يا باشا، حتى لو ابن عم جدك دي عيلة تانية، فمافيش أي مشاكل. كنت تقول قريبه من بعيد أو من نفس العيلة، لأن كلمة حفيده والمانشيتات اللي من الصبح عماله أشوفها mbc من الصبح عمالة تنزل حفيد حفيد، وكل الناس عندنا محدش بيتأكد من مصدر ولا من خبر".
واختتم محمد عبد الوهاب حديثه بتحذير كل من يحاول نسب نفسه لأسماء فنية كبيرة: "احنا النهاردة واحد يطلع يقول كلمة 5 آلاف بني آدم ياخدها وراه.. هو بقى تريند عشان اسم محمد فوزي، من غير اسم محمد فوزي ولا كان هيشوف التريند ولا كان هيشوف أي حاجة.. بس اللي أنا أعرفه الفنان الحقيقي بنفسه، أنا بروح لغاية دلوقتي كاستينج، مبقولش أنا حفيد فريد شوقي ولا هدى سلطان، ولا بتكلم.. فيها إيه لما تبقى راجل وبنفسك بشغلك انت شخصيتك انت، إنما ماتكذبش على الناس...هو بقى تريند اه، بس للأسف هيتحول التريند بدل النهاردة ما كان يتشهر بنفسه إنه محترم وإن صوته حلو، هيتقال إنه راجل طلع كدب على الناس.. بس لازم إنه يتعرف إنه مش حفيده عشان محدش يجي بعد كده ينزل أي خبر ويقول إنه هو حفيده.. أنا مضمنش هو يعمل إيه بعد كده، لو راح غنى أي كلام فارغ مش هيتقال حفيد فلان الفلاني يغني زفت، مينفعش احنا منعرفهوش".