هبة عبد العزيز تكتب: شوية تلكسات من غير كلكسات

قربنا نخلص 2025 ولسة ماخلصناش من ظاهرة زواج وانفصال المشاهير عشان التريند!! واخرهم طبعا المغني مسلم ووصلة الردح السوشيالجي اللي شغالة مع اخته وطليقته!!
حملات القبض على التيكتوكرز أصحاب المحتوى المبتذل جيدة ومش فاهمة الناس اللي بتدافع عايزة المجتمع يبقى شكله اية؟!
سمعت من زملائي إنه بيحصل حملة تصفية لعدد كبير من المعديين والمخرجين والمذيعين! مش فاهمة اية السبب وهل خراب البيوت عندكم عادي كدا؟!
الفنانين المصريين.. مافيش موسم الرياض يلا كله بيتك بيتك خلصت التكية ورونا بقى طلتكم الكريمة ومواهبكم المحدودة؟!
ايناس الدغيدي هاتتجوز.. الف مبروك حاجة متخصناش ولا هاتفرق في نزول سعر الدولار.. لا ازاي لازم العناوين في السوشيال تبقى كلها تنمر على عمر زوجها وعلى عمرها وعلى فرحها وعلى تاريخها وعلى أيامها!!
الكابتن حسام حسن.. طول عمري بشوفك كدا من ايام ما كنت طالبة في الاعدادية..متهور – عصبي – وطني.. متخافش من الكلام اللي بيتقال ان هاني ابوريدة هايمشيك من المنتخب حتي لو وصلت مع مصر لكاس العالم لإنه ببساطة اللي جابك مدرب هو اللي جاب هاني رئيس لاتحاد الكورة وهو بس اللي يقدر يمشيك ويمشي هاني.. جمد قلبك ياكابتن حسام..
محمد رمضان عمل سيشن مع أسرة الرئيس الأمريكي ترامب.. مش فاهمة ازاي ممكن تدفع رقم وقدره عشان تفضل تريند وخلاص؟! بالمناسبة اخر عمل فني لرمضان بقاله 4 سنين وربنا يجعله عامر..
النجمة وفاء عامر حلت ضيفة على الزميل احمد سالم في قناة اون E.. الحقيقة بعد ما تابعت الفقرة اتاكدت ان وفاء عامر ممثلة شاطرة جوه وبره الكاميرا..
مشهد مواساة الرئيس الأمريكي ترامب لزوجه الناشط اليميني المتشدد تشارلي الذي اغتيل برصاص قناص يساري هو مشهد عجيب غريب مريب مبالغ فيه وكفاية لحد كدا!!
جوجل بيقرا صوت مصر على طول من غير ما تفكر وبيقول انغام.. حفلة مسرح رويال ألبرت في لندن كانت أجمل عودة لأفضل مطربة مصرية في ال 30 سنة الأخيرة.. حمد الله على السلامة ومنتظرين الأفضل..
الممثلة الهام عبد البديع انفصلت عن زوجها وبعدين رجعت وبعدين اعتزلت التمثيل.. انتي متأكدة إنه ده مش مشهد في عمل درامي في سنة 2030؟!